परदेशीलाई चिठी (कविता)

– प्रदिप थापा

कुन बस्तीले ओझेल पार्‍यो सुन्दर गाउँघर
तिम्लाई सम्झी बुढी आमै रुन्छिन् धरधर
धान झुल्ने खेतका गरा बनसाराले ढाको
ठम्याउनलाई गाह्रो पर्ला घर आउने बाटो

गीत गाउँदै परदेशीलाई लेख्दै छु म चिठी
तिम्रै मात्र नाम लिन्छिन् हुँदा पनि घिटीघिटी

कुवा, धारा, खोल्सी बन्यो छैन पानीको आहाल
अन्नको भण्डार हुन्थ्यो, अहिले रैछ अनिकाल
मदानी र ठेकी छैन मूल थाम्मा धमिराको गोला
छम्‌छम्‌ गरी नाच्ने आँगन कहाँ पुग्यो होला ?

गीत गाउँदै परदेशीलाई लेख्दै छु म चिठी
तिम्रै मात्र नाम लिन्छिन् हुँदा घिटीघिटी

ठेगाना : गोलन्जोर -५ सिन्धुली