चितवन– नेकपा माओवादी केन्द्रका अध्यक्ष पुष्पकमल दाहाल प्रचण्डले पूर्व गृहमन्त्री एवम् रास्वपाका सभापति रवि लामिछानेलाई ज्यादती गरेमा संसदको विशेष अधिवेशन बोलाउने चेतावनी दिएका छन् ।
ADVERTISEMENT
चितवनमा आयोजित खबरदारी सभालाई सम्बोधन गर्दै उनले दुई–दुई पटक अत्याधिक मतले जितेका रविलाई अहिले राजनीतिक प्रतिशोधले आतंकित पार्ने ढंगले मध्यरातमा प्रहरीबाट ज्यादती भएको सुन्नमा आएको बताउदैँ सो चेतावनी दिएका हुन् ।
ADVERTISEMENT
सहकारी छानविनका नाममा सरकारले रवि लामिछानेमाथि सरकारले प्रतिशोधपूर्ण व्यवहार गरेको उनको आरोप छ । साथै प्रचण्डले रविलाई हिरासत बाहिर राखेर अनुसन्धान गर्न माग समेत गरेका छन् ।
‘देशको चौथो पार्टीको नेता भागेर विदेश जाने स्थिति छैन । मैले सरकार र सरकारवादी नेताहरुलाई भनेको छु, किन हिरासतमा राख्नुपर्यो ?’, उनले भने, ‘छाडेर जेजे अनुसन्धान गरे पनि भइहाल्यो नि ! रविजीले अदालतलाई सघाउँछु भनिराख्नुभएकै छ । रवि लामिछानेसँग कांग्रेस र एमाले किन तर्सिनपर्यो । सरकारले यो विषयमा ज्यादती गर्दा भने संसदको विशेष अधिवेशन बोलाएर हामी त्यहाँबाट पनि विरोध जनाउँछौं ।’
कांग्रेस र एमालेका ठूला नेताहरु नै सहकारी ठगको रुपमा देखा परिसकेको उनले जनाए । । ‘उनीहरुले जालझेल गरेर सहकारी ठगी गरेपछि श्रीमतीलाई डिभोर्स दिइसकेको भन्दै सँगै बसेका कुराहरु हामीले देखिरहेका छौं । तिनै नाटकबाजहरुलाई नै बचाउन यो सरकार लागिपरेको छ’, उनले थपे ।
कांग्रेस र एमालेका नेताहरूले रविलार्इ ‘प्रधानमन्त्री भइदिनुस्’ भनेको आफैँले सुनेको प्रचण्डको दाबी छ । ‘कांग्रेसले प्रधानमन्त्रीको प्रस्ताव राखेकै हो । तर, त्यतिबेला अहिले म होइन प्रचण्ड नै प्रधानमन्त्री बनाउनुपर्छ भन्ने मान्छे हो रवि लामिछाने,’ उनले भने ।
