ट्रम्पले ‘फ्रड’ भनेका कार्यक्रमको सम्झौता नै भएको छैन : अर्थ मन्त्रालय

काठमाडौँ – अर्थ मन्त्रालयले अमेरिकाले युएसएआईडीमार्फत नेपाललाई दिँदै आएको सहयोगबारे अमेरिकी राष्ट्रपति डोनाल्ड ट्रम्पले दिएको अभिव्यक्तिप्रति ध्यानाकर्षण जनाएको छ । सोमबार एक विज्ञप्ती जारी गर्दै अर्थ मन्त्रालयले ट्रम्पको आदेशका कारण सहयोगका कार्यक्रम रोकिएको र ट्रम्पले उल्लेख गरेका कार्यक्रम डिजाइनकै क्रममा रहेको जनाएको हो ।

उक्त कार्यक्रमबारे सम्झौता नै नभएकाले कुनै सहयोग प्राप्त नभएको मन्त्रालयले स्पष्ट पारेको छ । ‘जैविक विविधता, प्रदेश एवं स्थानीय शासन सुदृढीकरण कार्यक्रम र जलवायु उत्थानशील नगरपालिका सेवा कार्यक्रम गरी तीनवटा कार्यक्रमहरु डिजाइनको क्रममा रहेकोमा उक्त आदेशवाट यी कार्यक्रमहरु समेत रोकिएको अवस्था छ । डिजाइनको क्रममा रहेका उल्लेखित कार्यक्रमहरुको लागि सम्झौता नभइसकेको हुँदा कुनै सहयोग प्राप्त नभएको व्यहोरा जानकारी गराइन्छ।’

यस्तै मन्त्रालयल ट्रम्पको आदेशकै कारण सरकारको बजेट प्रणालीमार्फत सञ्चालन भइरहेका शिक्षा, स्वास्थ्य, कृषि र तथ्यांकसँग सम्बन्धित चारवटा कार्यक्रमहरु समेत ९० दिनका लागि रोकिएको जनाएको छ ।

ट्रम्पले केही दिन अघि अमेरिकाले नेपाललाई प्रदेश एवं स्थानीय शासन सुदृढीकरण कार्यक्रमका लागि २ करोड अमेरिकी डलर, जैविक विविधता संर र जलवायु उत्थानशील नगरपालिका सेवा कार्यक्रमका लागि ९ करोड अमेरिकी डलर दिएको र उक्त सहयोग ठगी भएको बताएका थिए ।