सिभिल अस्पतालका नवनियुक्त निर्देशक डा. रेग्मीद्वारा पदभार ग्रहण

काठमाडौँ– निजामती कर्मचारी (सिभिल) अस्पतालका नव नियुक्त निर्देशक प्रा.डा. मोहनचन्द्र रेग्मीले पदभार ग्रहण गरेका छन् ।

रेग्मीले एक समारोहबीच निवर्तमान निर्देशक डा. विधाननिधि पौडेलसहितको उपस्थितमा आज पदभार ग्रहण गरेका हुन् । पदभार ग्रहण गर्दै डा. रेग्मीले यसअघिका कार्यकारी निर्देशकले आफ्नो ४ वर्षे कालमा गरिएका प्रगतिहरुलाई यथावत् राखी इतिहासलाई हेर्दै भविष्यमा अघि बढ्ने बताए ।

‘अस्पतालमा दैनिक हजार बाहृ सय बिरामी आउनु सामान्य कुरा होइन । यो अस्पतालप्रतिको विश्वास र अस्पतालले दिएको सेवाको उपज पनि हो । आगामी दिनमा पनि यसलाई यथावत् राख्नेछु’, उनले भने ।

रेग्मीलाई बुधबार बसेको निजामती कर्मचारी अस्पताल विकास समितिको बैठकले कार्यकारी निर्देशकमा नियुक्त गरेको हो। सिभिल अस्पतालमै कार्यरत उनी युरोगाइनोलोजिस्ट(स्त्री तथा प्रसुति रोग विशेषज्ञ) हुन् ।

उनले यसअघि धरानस्थित विपी कोइराला स्वास्थ्य विज्ञान प्रतिष्ठानमा रजिस्ट्रारको अनुभव समेत संगालेका छन् ।