काठमाडौँ – नेपाल प्रहरीको ३१औँ प्रहरी महानिरीक्षक (आईजीपी)मा दीपक थापा नियुक्त आएका छन् । सोमबार बसेको मन्त्रिपरिषद्को बैठकले अतिरिक्त प्रहरी महानिरीक्षक (एआईजी) थापालाई आईजीपी बनाउने निर्णय गरेको सरकारका प्रवक्ता एवम् सूचना तथा सञ्चारमन्त्री पृथ्वीसुब्बा गुरुङले जानकारी दिए ।
ADVERTISEMENT
प्रहरीको ३१औँ आईजीको प्रतिस्पर्धामा थापासँगै एआईजी टेकबहादुर तामाङ र सुदीप गिरी प्रतिस्पर्धामा थिए । बहालवाला आईजीपी बसन्त कुँवर सोमबार (आज) राती १२ बजेदेखि ३० वर्षे सेवा अवधिका कारण अनिवार्य अवकाशमा जाँदैछन् ।
ADVERTISEMENT
रिक्त पदका लागि मन्त्रिपरिषद्ले थापालाई बढुवा गरेको हो । २०५२ सालमा प्रहरी निरीक्षकबाट प्रहरी सेवा सुरु गरेका उनी २०६३ भदौ ८ मा डिएसपी, २०७२ साउन ८ मा एसपी, २०७५ फागुन ६ गते एसएसपी र २०७९ असार १७ गते डिआइजी भएका थिए। २०७९ चैत ६ गते उनलाई एआइजीमा बढुवा गरिएको थियो ।
थापाले कानुनमा एलएलबी, राजनीति शास्त्रमा एमए र जनप्रशासनमा एमपिए गरेका छन्। सेवा अवधिको अन्तिम वर्षमा आइपुग्दा थापाले यो अवधिमा इलाका प्रहरी कार्यालय, साँगा, बुटवल र रौतहटको गरुढामा नेतृत्व गर्ने अवसर पाएका छन् ।
यस्तै प्रहरी वृत्त, महाराजगञ्जको पनि प्रमुख, जिल्ला प्रहरी कार्यालय, रुकुम, खोटाङ, सुनसरी, मोरङ, मकवानपुर र चितवनको प्रमुखका रुपमा नेतृत्व सम्हालेका छन् ।
यस्तै थापाले बुटवल तालिम केन्द्र र प्रहरी प्रशिक्षण प्रतिष्ठान महाराजगञ्जमा समेत काम गरिसकेका थापाले अख्तियार दुरुपयोग अनुसन्धान आयोगको सुर्खेत र बुटवल कार्यालयको प्रमुख भएर समेत काम गरेका छन् ।
एसपी हुँदा उपत्यका अपराध अनुसन्धान कार्यालय र डीआईजी हुँदा बागमती प्रदेश प्रहरीको नेतृत्व गरेका उनी प्रबन्ध निर्देशनालय, प्रशासन विभाग, उपत्यका प्रहरी कार्यालयमा समेत नेतृत्वमा रहेर अनुभव संगालेका छन् ।
थापा ३० वर्षे सेवा अवधिको प्रावधान रहीरहे ६ महिनापछि अवकाशमा जानेछन् ।
