कांग्रेस-एमालेसहितको सरकारमा सहभागी हुने कुनै नीति छैन : प्रचण्ड

काठमाडौँ – नेकपा माओवादी केन्द्रका अध्यक्ष पुष्पकमल दाहाल प्रचण्डले कांग्रेस–एमालेसहितको सरकारमा सहभागी हुने कुनै नीति नरहेको स्पष्ट पारेका छन् ।

सोमबार काठमाडौंमा राजेन्द्र श्रेष्ठद्वारा लिखित पुस्तकको बिमोचन गर्दै प्रचण्डले सरकारमा जाने कुनै नीति नलिएको र यसबारे कुनै छलफल समेत नभएको बताए । प्रचण्डले मुलुकमा कुनै सङ्कट आएको खण्डमा समाधानको विचार दिन भने आफूहरु तयार रहेपनि यही सरकारमा सामेल हुन भने नसकिने स्पष्ट पारे ।

कांग्रेस, एमाले र माओवादी मिलेर सरकार बनाउने भन्दै बाहिर आएका चर्चामा सत्यता नरहेको उनले बताए । उनले कांग्रेस–एमालेले भ्रष्टाचारीलाई बचाउने उद्देश्यले सरकार बनाएको भन्दै वर्तमान सरकारप्रति सुरुदेखि नै विमति रहेको धारणा राखे ।

प्रचण्डले इतिहासको चक्का पछाडी फर्काउने दुष्साहस भएको भन्दै सवै मिलेर त्यसको प्रतिवाद गरेर उपलव्धीलाई जोगाउनुपर्नेमा जोड दिए । राजावादीको क्रियाकपाल संविधान विपरित भएको र जनतालाई फेरि एकचोटी रैती बनाउनेतिर प्रेरित रहेको उनको भनाई छ ।

प्रचण्डले स्वार्थका लागि नभइ जनताको आवश्यकताका आधारमा परिवर्तन नउल्टाउने गरि संविधान संशोधन गर्नुपर्ने बताए । उनले संघीय लोकतान्त्रिक गणतन्त्र आएपछि जनताको अपेक्षा अनुसार काम हुन नसकेकाले त्यसको समिक्षा र समाधानका लागि माओवादी अघि बढेको धारणा राखे ।