क्यानले माग्यो जर्सीको मुख्य प्रायोजक, न्यूनतम मूल्य वार्षिक २ करोड !

काठमाडौँ – नेपाल क्रिकेट संघ (क्यान)ले नेपाली राष्ट्रिय पुरुष क्रिकेट टोलीको जर्सीको मुख्य प्रायोजकका लागि प्रस्ताव माग गरेको छ । क्यानले सोमबार एक सूचना जारी गर्दै आगामी तीन वर्षका लागि नेपाली राष्ट्रिय पुरुष क्रिकेटको जर्सीको मुख्य प्रायोजक खोजेको हो ।

जसका लागि प्रस्ताव पेश गर्न कम्पनी तथा ब्राण्डहरुलाई आह्वान गरेको हो । नेपाल सरकारको नियम अनुसार योग्य सबै ब्राण्डहरुले प्रस्ताव पेश गर्न पाउनेछन् । तीन वर्षका लागि हुने सम्झौताका लागि प्रस्तावको रकम वार्षिक कम्तिमा २ करोड हुनुपर्नेछ । जुन प्रत्येक वर्ष १० प्रतिशतका दरले बढ्ने क्यानले जनाएको छ ।

क्यानका अनुसार मुख्य प्रायोजकले आफ्नो ब्राण्डको लोगो नेपाली टोलीको जर्सीको अघिल्तिर अन्तर्राष्ट्रिय क्रिकेट काउन्सिल (आईसीसी)को नियमन अनुसार राख्न पाउने छ ।

प्रस्ताव चैत्र २९ गतेभित्र क्यान प्रधान कार्यालय मूलपानीमा पेश गर्नुपर्ने छ । पेश भएका सम्पूर्ण प्रस्तावहरु सोही दिन खोलिने र सबैभन्दा बढी रकम राखेको कम्पनीको प्रस्ताव स्वीकृत हुनेछ ।

यसअघि शैक्षिक कम्पनी आईएनजी समूहको ‘माई सेकेण्ड टिचर’ले नेपाली टोलीको मुख्य प्रायोजन गरेको थियो । उक्त सम्झौताको रकम भने खुलाइएको थिएन । सम्झौता अवधि सकिएसँगै क्यानले खुला रुपमा पुनः प्रस्ताव आह्वान गरेको हो ।