बढ्दो वायु प्रदूषण कम गर्न सरकारले आवश्यक कार्य गर्दैछ : कार्यवाहक प्रधानमन्त्री सिंह

काठमाडौँ – कार्यवाहक प्रधानमन्त्री प्रकाशमान सिंहले बढ्दो वायु प्रदूषण कम गर्न सरकारले आवश्यक कार्य गर्ने बताएका छन् ।

बिहीबार सहरी विकास मन्त्रालयमा सरोकारवाला लगाएत विज्ञहरुसंग छलफल गर्दै सिंहले वायु प्रदूषण बढ्दै गएकाले यसलाई न्यूनीकरण गर्न सरकारले आवश्यक कदम चाल्ने बताएका हुन् । उनले सरकारले अरु निकायहरुसंग छलफल गरेर आवश्यक कदम चाल्ने जिकिर गरे ।

बैठकमा वन मन्त्रालयमा प्रतिनिधिहरुले अहिले वायु प्रदूषण निकै बढ्दै गएकाले जोर–विजोर सवारी सञ्चालन गर्ने गरी सातामा दुई दिन विदा दिनुपर्ने अवस्था आउन सक्ने जनाएका थिए । कार्यवाहक प्रधानमन्त्री सिंहले सबैको परामर्शमा छिटै आवश्यक निर्णयमा पुगिने उल्लेख गरे ।

छलफलमा सरोकारवालाहरुले तत्काल वायु प्रदूषण कम गर्न सवारी साधनको चापलाई घटाउनुपर्ने सुझाव दिएका थिए । छलफलमा निर्माण व्यवसायी, यातायात व्यवसायी लगाएत सरोकारवाला मन्त्रालयको उपस्थीति रहेको थियो ।