सुरेश रजकको परिवारलाई भेट्दै देउवाले भने : तीनकुने घटनाका दोषीलाई छोड्नु हुँदैन

काठमाडौँ – नेपाली कांग्रेसका सभापति शेर बहादुर देउवाले तीनकुनेमा भएको हिंसात्मक घटनाका दोषिलाई छोड्न नहुने बताएका छन् ।

आइतबार तीनकुने घटनामा मारिएका पत्रकार सुरेश रजकका परिवारसंग भेट गर्दै सभापति देउवाले उक्त घटनाका दोषीलाई कारवाही गर्नुपर्ने भन्दै कसैलाई छाड्न नहुने बताएका हुन् । जसले गरेको हो, त्यसलाई कुनै पनि हालतमा छोड्नुहुँदैन । हाम्रो पार्टीेको कुरा पनि यही हो ।’ उनले भने, ‘यत्रो मान्छे मारेको छ, निजी सम्पत्ति, पार्टी कार्यालयमा समेत आगो लगाएको छ, छाड्ने कुरै छैन ।’

सो क्रममा रजकका परिवारले उक्त घटनाको छानविन नै नभएको दोषी उम्कन सक्ने आशंका व्यक्त गरेका थिए । सभापति देउवाले तीनकुने घटनाको छानविन गर्नुपर्ने पार्टी निर्णय रहेको सुनाए ।

राजावादीको आन्दोलनमा पार्टी कार्यालयदेखि सरकारी संरचनाका साथै धेरै निजी संरचना ध्वस्त पारेको भन्दै सभापति देउवाले सरकारले घटनामा संलग्नलाई कारवाही गर्नुपर्ने उल्लेख गरे । सुरेश रजकका परिवारले सवै मिलेर पीडितलाई न्याय दिने अवस्था बनाउन आग्रह गरेका थिए ।