गभर्नर नियुक्तिको हल्लाले शेयर बजारमा हरियाली, ४९ अंकले बढ्यो नेप्से

काठमाडौँ – नेपाल राष्ट्र बैँकको गभर्नर नियुक्तिको हल्लाले शेयर बजारमा हरियाली देखिएको छ । नेपाली काँग्रेसका डा. विश्व पौडेललाई गभर्नर बनाउने सहमति भएको हल्लासँगै नेपाल स्टक एक्सचेञ्ज (नेप्से) परिसूचक उच्च अङ्कले बढेको हो

जस अनुसार मंगलबार नेप्से परिसूचक ४९.०९ अङ्कले बढेर २ हजार ६७७.४५ को विन्दुमा कायम भएको हो । यो एक दशमलव ८६ प्रतिशतको वृद्धि हो ।

आज तीन सय १० कम्पनीको एक करोड ६८ लाख ८८ हजार चार सय ५९ कित्ता शेयर ७३ हजार ५४ पटक खरिदबिक्री हुँदा रू सात अर्ब ३१ करोड २७ लाख ९० हजार एक सय ९६ बराबरको कारोबार भएको नेप्सेले जनाएको छ ।

आजको कारोबारमा सबै समूहको उपसूचक हरियो देखिएको छ । सबैभन्दा धेरै होटल तथा पर्यटन समूह तीन दशमलव ४२ प्रतिशतले बढेको छ । बैंकिङ १.९१, विकास बैङ्क २.९५, वित्त २.४४, जलविद्युत् २.४५ र लगानी समूह २.३३ प्रतिशतले बढेको छ । त्यस्तै, जीवन बीमा १.३२, उत्पादन तथा प्रशोधन १.८९, लघुवित्त १.१३, म्युचुअल फन्ड ०.३३, निर्जीवन बीमा एक दशमलव ७४, व्यापार १.४९ र अन्य समूह ०.८४ प्रतिशतले बढेको छ ।

सिन्धु विकास बैङ्क लिमिटेड र सप्तकोशी डेभलपमेन्ट बैङ्क लिमिटेडको शेयर मूल्यमा आज सकारात्मक सर्किट लागेको छ । सबैभन्दा धेरै गुमाउनेमा भने विन नेपाल लघुवित्त वित्तीय संस्था लिमिटेडको शेयर मूल्य ३.०९ प्रतिशतले घटेको छ ।

कारोबार रकमका आधारमा आज सबैभन्दा धेरै राधी विद्युत् कम्पनी लिमिटेडको रू ४१ करोड ८० लाख बराबरको शेयर किनबेच भएको छ । कारोबार भएका शेयर संख्याका आधारमा भने सबैभन्दा धेरै प्रभु सेलेक्ट फन्डको १४ लाख ७२ हजार तीन सय कित्ता खरिदबिक्री भएको छ ।