कांग्रेस, एमाले र माओवादीका कारण देशको अवस्था परिवर्तन हुन सकेन : बाबुराम भट्टराई

काठमाडौँ – नेपाल समाजवादी पार्टी (नयाँ शक्ति)का अध्यक्ष डा. बाबुराम भट्टराईले कांग्रेस, एमाले र माओवादीका कारण देशको अवस्थामा परिवर्तन हुन नसकेको बताएका छन् ।

पार्टीको १० औं स्थापना दिवसका अवसरमा बिहीबार काठमाडौंमा पत्रकार सम्मेलन गर्दै भट्टराईले तीन दलका नेताहरुले १० बर्षका कुर्सी साटासाट गर्ने बाहेक केही गर्न नसकेकाले देशको अवस्थामा परिवर्तन हुन नसकेको बताएका छन् ।

अहिले मुलुकमा सुशासन कायम हुन नसकेको बरु भ्रष्टाचारका चाङ उदाङ्गो हुन थालेको उनले बताए । त्यस्तै भट्टराईले सत्तामा पुग्ने र आफ्नो भ्रष्टाचार लुकाउन विपक्षीलाई देखाउने प्रवृति देखापरेको उल्लेख गरे ।

उनले मुलुकको अवस्था हेर्दा पुराना दलहरुबाट मुलुकको परिवर्तन नहुने देखाएको जिकिर गरे । आर्थिक विकास र समृद्धिका निम्ति मुखले ठूला कुरा गरेरमात्रै नहुने उनको भनाइ छ ।

भट्टराईले सरकारले ल्याएको बजेटमा नयाँ कुनै पनि कुरा नरहेको टिप्पणी गरे । पार्टीको स्थापना दिवसका अवसरमा शुक्रबार काठमाडौंमा सुशासन र समृद्धिका बिषयमा छलफल कार्यक्रमको आयोजना गरेको उनले जानकारी दिए । कार्यक्रममा पुराना नभइ नयाँ बैंकल्पीक शक्तिहरु र पुराना दलबाट बिद्रोह गरेका नेताहरुलाई आमन्त्रित गरिएको भट्टराईले बताए ।