काठमाडौँ– नयाँ शक्तिले नागार्जुन नगरपालिका वडा. नम्बर ७ का वडाध्यक्ष मदन गिरी अपहरणमा परेको बताएको थियो । उनी शुक्रबार गोदावरीमा भेटिएको महानगरीय प्रहरी परिसर काठमाडौंका प्रमुख एसएसपी छबिलाल जोशीले बताए ।
प्रहरीले अपहरण काण्डबारे अनुसन्धान गरिएको छ । तर, चुनावमा चर्चामा आउन अपहरणको नाटक गरेको आशंका गरिएको छ । ‘हामीले उहाँको राजनीतिक, आर्थिक, पारिवारिक सबै पक्षको अध्ययन गरिरहेका छौं’ अनुसन्धानमा संलग्न एक प्रहरी अधिकारीले भने, ‘यो अपहरणको नाटक जस्तो मात्र देखिन्छ ।’
नेपाली सेनाका पूर्व जमदार तथा मार्सल आर्टस्का खेलाडीसमेत रहेका गिरी वेपत्ता भएपछि प्रहरीको ५ वटा टोलीले उनको खोजी गरिरहेको थियो ।
प्रहरीका अनुसार गिरीले काठमाडौँको सोह्रखुट्टेको कारवासमा बा ११ च ४०२९ नम्बर गाडी धुनका लागि छाडेपछि तीन जना व्यक्तिले भेट्नका लागि बोलाएको र अपहरण गरेको बयान दिएका छन् ।
गिरीले चार जनाको समूहले आफूलाई अपहरण गरेको भन्दै एसएमएस गरेका थिए । लगतै प्रहरीले उनको खोजी थालेको थियो । तर, उनी अपहरणमा परेको नभई सम्पर्क बाहिर बसेको अवस्थामा भेटिएको प्रहरीले जनाएको छ ।