विवेकशील साझाद्वारा प्रदेश नं ३ को संयोजकमा समीक्षा बास्कोटा चयन

काठमाडौँ– विवेकशील साझा पार्टीले प्रदेश नं ३ को संयोजकमा कानुनकर्मी तथा व्यवसायी समीक्षा बास्कोटालाई चयन गरेको छ । बास्कोटा गत निर्वाचनमा काठमाडौँ क्षेत्र नं १ ‘क’ बाट प्रदेशसभाको उमेदवार थिइन् ।

३४ वर्षीया बास्कोटाले काठमाडौँ स्कुल अफ ल बाट कानुनमा स्नातक गरेर अमेरिकाको सेण्ट जन्स विश्वविद्यालयबाट कानुनमैं स्नातकोत्तर गरेकी छन्। स्नातकोत्तरपछि ‘डिन्स फेलो’ मनोनीत भएर केही समय अमेरिकामैं काम गरी २०६७ सालमा नेपाल फर्किएकी बास्कोटाले त्यसपछिका वर्षहरू प्राध्यापन, कानुनी अभ्यास, पारिवारिक व्यवसाय तथा परोपकारी गतिविधिमा बिताएकी छन्।

पारिवारिक पृष्ठभुमिले गर्दा राजनीतिक माहौलमा हुर्किने अवसर पाएकि बास्कोटा राष्ट्रलाई बृहत्तररूपमा योगदान पुर्याउने सबैभन्दा सशक्त माध्यम इमानदार राजनीति नै हो भन्नेमा विश्वास राख्छिन् ।

गत निर्वाचनमा विवेकशील साझा पार्टीको तर्फबाट काठमाडौँ क्षेत्र नं १ ‘क’ को प्रदेशसभाको उमेदवार बनेर २७ प्रतिशत मत ल्याएकी उनले सम्मानजनक तेस्रो स्थान हासिल गरेकी थिइन्।

एक जना सुशिक्षित, उद्दमी, क्षमतावान र उर्जावान महिलालाई प्रदेश नं ३ को संयोजक तथा केन्द्रीय सदस्यका रूपमा पार्टीमा स्वागत गर्न पाउँदा गौरवको अनुभूति गरेको पार्टीले जनाएको छ ।