सामान्य फोन विवादले लियो ज्यान, छुरा प्रहारबाट घाइते भएका दुई युवकको मृत्यु

काठमाडौं – बुधबार अपराह्न पाटनको दरबार क्षेत्रमा छुरा प्रहारबाट गम्भीर घाइते भएका झापाका दुई युवकको मृत्यु भएको छ । स्थानीय बिएण्डबी अस्पतालमा उनीहरूको आज बिहान मृत्यु भएको हो ।

ललितपुर जिल्ला प्रहरी परिसरका अनुसार झापाको कमल गाउँपालिका–६ का सुमित र सृजन नेम्बाङको मृत्यु भएको हो ।

नेम्बाङ दाजुभाइको हत्या अभियोगमा ललितपुर महानगरपालिका–९ का सञ्जीव नेपाली र गैँडाकोटका गगन सुनारलाई पक्राउ गरिएको छ ।

प्रहरीले उनीहरुको हत्या प्रकरणमा थप अनुसन्धान सुरु गरिएको जनाएको छ । जिल्ला प्रहरी परिसर ललितपुरका प्रमुख एसएसपी होविन्द्र बोगटीले दाजुभाइमाथि छुरा प्रहार गरि हत्या गर्ने सञ्जीव नेपाली र उनका सहयोगी गगन सुनारलाई पक्राउ गरि थप अनुसन्धान सुरु गरिएको जानकारी दिए ।

सामान्य फोन कल गलत नम्बरमा पुगेपछि विवाद सुरु भएको र त्यसपछि सञ्जीवले दाजुभाइलाई पाटनमा बोलाएको खुलेको छ । पाटनमा भेटका क्रममा सञ्जीवले झापाको कमल गाउँपालिका–६ का बर्ष ३३ का सुमित नेम्बाङ र बर्ष २५ का सृजन नेम्बाङलाई छुरा प्रहार गरि हत्या गरेको प्रारम्भीक अनुसन्धानबाट खुलेको एसएसपी बोगटीले जानकारी दिए ।

पक्राउ परेका सञ्जीव नेपाली मासु पसलमा काम गर्ने गरेको र यसअघि पनि अपराधीक गतिविधिमा लागेको देखिएको प्रहरीले जनाएको छ । घटनाको सिसिटिभि क्यामरा र प्रत्यक्षदर्शीसंग सोधपुछ गरेर थप अनुसन्धान भइरहेको एसएसपी बोगटीले बताए ।