आर्थिक विकासमा निजी क्षेत्रको भूमिका महत्वपूर्ण : राष्ट्रपति पौडेल

काठमाडौं – राष्ट्रपति रामचन्द्र पौडेलले व्यापारव्यवसाय, उद्योग धन्दा र आर्थिक क्रियाकलापको विकास र विस्तार नै मुलकको आर्थिक समृद्धिको मूल आधार भएको बताएको छ ।

शुक्रबार काठमाडौंमा नेपाल चेम्बर अफ कमर्सको ७५ औँ वार्षिक साधारण सभा तथा हीरक जयन्ती समारोहलाई सम्बोधन गर्दै राष्ट्रपति पौडेलले सङ्घीय लोकतान्त्रिक गणतन्त्रलाई अझै सुदृढ बनाउन जनताले चाहेको आर्थिक समुद्धितर्फ जुटनसमेत सबैलाई आव्हान गरे ।

मुलुकलाई एउटा जटिल परिस्थितिबाट निकास दिन सफलतापूवर्क सम्पन्न भएको निर्वाचनले जननिर्वाचित संसद र सरकारलाई सुशासनमार्फत आर्थिक समृद्धि र चुस्त सेवा प्रवाह गरी जनताको जीवनस्तर उकास्न एउटा गहन दायित्व सुम्पेको उनले बताए ।

उनले राज्यको यो दायित्व पूरा गर्न निजी क्षेत्रको पनि त्यतिकै भूमिका हुने धारणा राखे । राजनीतिक स्थिरता आर्थिक समृद्धिको आधार भएको भन्दै राष्ट्रपति पौडेलले स्थिर सरकार, स्पष्ट नीति र दिगो रणनीतिले मात्र औद्योगिक विकास, लगानी विस्तार र रोजगारी सिर्जनालाई गति दिन सक्ने बताए । उनले निजी क्षेत्रलाई केवल कर तिर्ने निकायको रूपमा नभइ राष्ट्र निर्माणको साझेदारका रूपमा हेर्न आवश्यक रहेको उल्लेख गरे ।

मुलुकको आर्थिक समृद्धि, उद्योग व्यवसायको प्रवद्र्धन, लगानीमैत्री वातावरण निर्माण तथा उद्यमशीलताको विकासमा निजी क्षेत्रको प्रतिनिधिमूलक पहिलो संस्था चेम्वरले निरन्तर दिएको योगदान प्रशंसनीय रहेको उनले बताए ।