सीमा सम्बन्धी अभिव्यक्तिमा प्रधानमन्त्रीको भनाइप्रति कांग्रेस सांसद थापाको आपत्ति, राष्ट्रिय हितमा सचेत हुन आग्रह

काठमाडौँ – नेपाली कांग्रेसका सांसद सुनिलबहादुर थापाले प्रधानमन्त्री बालेन्द्र शाहले नेपाल–भारत सीमा सम्बन्धमा दिएको अभिव्यक्तिप्रति गम्भीर आपत्ति जनाएका छन्। उनले उक्त अभिव्यक्ति गैरजिम्मेवार, तथ्यहीन र कूटनीतिक दृष्टिले संवेदनशील भएको भन्दै त्यसले नेपालको अन्तर्राष्ट्रिय छवि कमजोर पार्न सक्ने चेतावनी दिएका छन्।

राष्ट्रिय सभाको बुधबारको बैठकमा बोल्दै सांसद थापाले सीमा तथा सार्वभौमिकतासँग जोडिएका विषयमा सरकार प्रमुखले अत्यन्त जिम्मेवार र प्रमाणमा आधारित भएर मात्र धारणा राख्नुपर्नेमा जोड दिएका छन्। उनका अनुसार यस्ता संवेदनशील विषयमा गरिएको असावधानीपूर्ण अभिव्यक्तिले छिमेकी मुलुकसँगको सम्बन्धमा समेत नकारात्मक असर पार्न सक्ने उनले जिकिर गरेका छन्।

थापाले प्रधानमन्त्रीसँग आफ्नो भनाइ पुष्टि गर्ने ठोस प्रमाण भए संसद् र आम नागरिकसमक्ष सार्वजनिक गर्नुपर्ने बताएका छन्। प्रमाण नभए राष्ट्रसँग क्षमायाचना गर्नुपर्ने उनको स्पष्ट माग रहेको छ। उनले राष्ट्रिय हितसँग सम्बन्धित विषयमा भ्रम सिर्जना हुने कुनै पनि अभिव्यक्तिलाई स्वीकार गर्न नसकिने उल्लेख गरेका छन्।

उनले नेपाल–भारत सीमा विवाद जस्ता विषयहरू द्विपक्षीय संवाद र स्थापित कूटनीतिक संयन्त्रमार्फत समाधान गर्नुपर्नेमा जोड दिँदै तेस्रो पक्षलाई जोड्ने संकेत वा प्रयास चिन्ताजनक भएको टिप्पणी गरेका छन् । उनका अनुसार यसले नेपाल–भारतबीचको विश्वासमा कमी ल्याउन सक्ने जोखिम रहने देखिन्छ।

सांसद थापाले परराष्ट्र मन्त्रालयले दिएको स्पष्टीकरणले समेत विषयलाई स्पष्ट बनाउन नसकेको भन्दै थप प्रश्नहरू उठाएको बताएका छन्। उनले सरकारलाई यस्ता संवेदनशील विषयमा एकरूपता र स्पष्टता अपनाउन आग्रह गर्दै संसद् अवरोध अन्त्य गरी जिम्मेवार भूमिका निर्वाह गर्न प्रधानमन्त्रीलाई सुझाव दिएका छन्।