काठमाडौं – नेकपाका संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ ले वर्तमान राजनीतिक परिस्थितिमा कम्युनिस्ट शक्तिबीच सहकार्य र एकता अपरिहार्य रहेको बताएका छन्। जननेता मदन भण्डारीको ७५औँ जन्मजयन्तीका अवसरमा आइतबार राष्ट्रिय सभागृहमा आयोजित कार्यक्रममा सम्बोधन गर्दै उनले कम्युनिस्ट आन्दोलनलाई विभाजन र अविश्वासबाट जोगाउन आपसी समझदारी, सहकार्य र साझा राजनीतिक दृष्टिकोण आवश्यक रहेको बताए।
ADVERTISEMENT
उनले कम्युनिस्ट शक्तिहरूबीच सहकार्य हुन नसके राजनीतिक रूपमा गम्भीर परिस्थिति सिर्जना हुन सक्ने चेतावनी दिँदै विभाजनले जनतामा निराशा बढ्ने र आन्दोलन कमजोर बन्ने धारणा राखेका छन्। जनताले देशमा समाजवादको यात्रालाई अघि बढाउन कम्युनिस्टहरू एकताबद्ध भएर अघि बढेको हेर्न चाहेको उल्लेख गर्दै उनले मिल्नुको विकल्प नरहेको बताएका छन्।
ADVERTISEMENT
प्रचण्डले संविधानमाथि विभिन्न कोणबाट दबाब र चुनौती देखिएको दाबी गर्दै लोकतन्त्र, गणतन्त्र र संविधानको रक्षा गर्न कम्युनिस्ट शक्तिमात्र होइन, कांग्रेस तथा मधेशवादी दललगायत लोकतान्त्रिक शक्तिहरूबीच पनि आवश्यक सहकार्य हुनुपर्नेमा जोड दिएका छन्। प्रतिक्रियावादी शक्तिहरू संविधान र परिवर्तनका उपलब्धिविरुद्ध सक्रिय रहेको उनको आरोप थियो।
उनले जननेता मदन भण्डारीको राजनीतिक योगदानको स्मरण गर्दै उनले अघि सारेका विचार, सिद्धान्त र जनमुखी राजनीतिक अभ्यास आज पनि उत्तिकै सान्दर्भिक रहेको बताएका छन्। भण्डारीका विचारलाई व्यवहारमा उतार्दै राष्ट्रिय एकता, राजनीतिक स्थिरता र समृद्धिको दिशामा अघि बढ्नुपर्नेमा उनले जोड दिएका छन्।
कार्यक्रममा मदन भण्डारीले प्रतिपादन गरेको बहुदलीय जनवाद, नेपाली कम्युनिस्ट आन्दोलनको विकासक्रम तथा समसामयिक राजनीतिक विषयमा समेत व्यापक छलफल गरिएको छ।
