काठमाडौं- नेकपा एमाले निकट भातृ संगठन नेपाल खेलकुद महासंघको अध्यक्षमा दिपेन्द्र दाहाल निर्वाचित भएका छन् ।
ADVERTISEMENT
महासंघको राष्ट्रिय भेलाले दाहालको नेतृत्वमा नयाँ केन्द्रीय कार्यसमिति चयन गरेको हो ।
ADVERTISEMENT
सो अबसरमा एमाले अध्यक्ष तथा पूर्वप्रधानमन्त्री केपी शर्मा ओली,जनसंगठन संयन्त्रका प्रमुख विशाल भट्टराई, एमाले संगठन बिभाग प्रमुख भानुभक्त ढकाल, महासंघका पूर्वअध्यक्ष पर्शुराम बस्नेत लगायतका नेता तथा युवाहरूको उपस्थिति रहेको थियो ।
महासंघको नेतृत्वमा दाहालको आगमनलाई एमालेको खेलकुद तथा युवा अभियानमा नयाँ ऊर्जा थपिएको रूपमा हेरिएको छ ।
नेपाल खेलकुद महासंघ देशको खेलकुद क्षेत्रमार्फत युवाहरूलाई संगठित गर्ने, खेल प्रतिभाको विकास गर्ने, खेलाडीको हकहितका पक्षमा आवाज उठाउने तथा राष्ट्रिय खेलकुद नीतिमा योगदान पुर्याउने उद्देश्यसहित सक्रिय संगठनका रूपमा परिचित छ। विशेषतः नेकपा एमालेसँग आबद्ध यो संगठनले खेलकुदलाई सामाजिक रूपान्तरण र राष्ट्रिय विकाससँग जोडेर विभिन्न अभियान सञ्चालन गर्दै आएको छ।
नवनिर्वाचित अध्यक्ष दिपेन्द्र दाहाल यसअघि महासंघको उपाध्यक्षका रूपमा सक्रिय थिए। दाहाल युवा पुस्तामाझ सक्षम, इमानदार, एक्सन–ओरियन्टेड तथा लोकप्रिय नेताका रूपमा परिचित छन्। संगठन निर्माण, जिम्मेवारी बहन र कार्यसम्पादनमा परिणाममुखी शैलीका कारण उनले राजनीतिक र सामाजिक दुवै क्षेत्रमा छुट्टै पहिचान बनाएका छन्।
खेलकुद क्षेत्रलाई व्यवस्थित, मर्यादित र व्यावसायिक बनाउनुपर्ने धारणा राख्दै आएका दाहालको नेतृत्वमा नेपाल खेलकुद महासंघले आगामी दिनमा खेल प्रतिभा उत्पादन, खेल पूर्वाधार विकास, खेलाडीमैत्री वातावरण निर्माण तथा राष्ट्रिय खेलकुद अभियानलाई थप प्रभावकारी बनाउने अपेक्षा गरिएको छ।
नयाँ नेतृत्व चयनसँगै महासंघ अब देशभर युवाहरूलाई खेलकुदमार्फत संगठित गर्दै स्वस्थ, अनुशासित र प्रतिस्पर्धी समाज निर्माणको अभियानमा अझ सशक्त रूपमा अघि बढ्ने विश्वास गरिएको छ।
