भोटेकोशी बाढीमा मृत्यु हुनेको संख्या ७ सय नाघ्यो, २ हजार ४ सय ९८ अझै सम्पर्कविहीन

काठमाडौं – रसुवाको भोटेकोशी नदीमा आएको भीषण बाढीमा परी मृत्यु हुनेको संख्या ७ सय नाघेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार आइतबार बिहानसम्म देशका विभिन्न जिल्लाबाट ७ सय ३४ जनाको शव फेला परेको छ ।

प्राधिकरणका अनुसार रसुवामा १३, धादिङमा ५०, तनहुँमा ३६, नुवाकोटमा ५२, गोरखामा ५८, चितवनमा २ सय ५९, नवलपरासी पूर्वमा १ सय ८५ र नवलपरासी पश्चिममा ८२ जनाको शव फेला परेको हो ।

बाढी प्रभावित क्षेत्रमा उद्धार कार्य भने जारी छ । प्राधिकरणका अनुसार हालसम्म ८ हजार १ सय ८६ जनाको उद्धार गरिएको छ भने २ हजार ४ सय ९८ जना अझै सम्पर्कविहीन छन् । यसैबीच, नेपाली सेना, नेपाल प्रहरी र सशस्त्र प्रहरी बलका गरी ८४ जना सुरक्षाकर्मीसमेत सम्पर्कविहीन रहेको जनाइएको छ ।

उद्धार कार्यलाई प्रभावकारी बनाउन नुवाकोटको त्रिशूलीस्थित श्री नम्बर १ सैन्य तालिम केन्द्रबाट हेलिकप्टर परिचालन गरिएको छ । उद्धार गरी ल्याइएकाहरूको सोही केन्द्रमा उपचारको व्यवस्था मिलाइएको छ भने उद्धार गरिएकाको नामावली सार्वजनिक रूपमा टाँसेर परिवारजनलाई जानकारी दिने व्यवस्था गरिएको छ ।

आफन्तको खोजीमा रहेका परिवारजनको सैन्य तालिम केन्द्रमा ठूलो भीड लाग्ने गरेको छ । उनीहरूले बेपत्ता आफन्तको नाम सुरक्षाकर्मीलाई टिपाउँदै खोज तथा उद्धार कार्यलाई तीव्र बनाउन आग्रह गरिरहेका छन् ।

भोटेकोशी बाढीपछि भएको मानवीय क्षति भयावह बन्दै गएको छ । मृतकको संख्या ७ सय ३४ पुगे पनि अझै हजारौँ व्यक्ति सम्पर्कविहीन रहेकाले मृतकको संख्या थप बढ्न सक्ने आशंका गरिएको छ ।