काठमाडौं – भदौ २४ गते भएको आगजनी र तोडफोडका घटनाबारे पूर्वप्रधानमन्त्री डा. बाबुराम भट्टराईले फेरि गम्भीर प्रश्न उठाएका छन् । घटनाको सतहमै सीमित भएर निष्कर्ष निकाल्नुभन्दा त्यसको पृष्ठभूमि, संलग्नता र क्षतिको वास्तविकता पत्ता लगाउन उच्चस्तरीय तथा विश्वसनीय छानबिन आवश्यक रहेको उनको भनाइ छ ।
ADVERTISEMENT
भट्टराईले विशेषगरी राज्यका महत्वपूर्ण संरचना र ऐतिहासिक अभिलेखसम्म नष्ट हुने गरी भएको गतिविधिलाई सामान्य घटनाका रूपमा नलिन आग्रह गरेका छन् । लोकतान्त्रिक व्यवस्थाका आधारभूत संस्थामाथि नै क्षति पुग्ने गरी भएको आगजनी र तोडफोडको तथ्य सार्वजनिक नगरी त्यसको अध्याय बन्द गर्न खोजिए भविष्यमा थप प्रश्न उठ्ने उनले संकेत गरेका छन् ।
ADVERTISEMENT
यसअघि छानबिनका लागि गठन गरिएको कार्की आयोगको प्रतिवेदन सार्वजनिक गर्नुपर्ने माग पनि उनले दोहोर्याएका छन् । प्रतिवेदन बाहिर आएपछि त्यसमा समेटिएका तथ्य र छुटेका विषयलाई आधार बनाएर भदौ २४ का घटनाको थप अनुसन्धान अघि बढाउनुपर्ने उनको धारणा छ ।
भट्टराईले घटनामा को जिम्मेवार थियो भन्ने प्रश्नको उत्तर राजनीतिक आरोप वा अनुमानबाट नभई प्रमाणबाट खोजिनुपर्ने बताएका छन् । आगजनी, तोडफोड तथा महत्वपूर्ण अभिलेखको विनाशमा संलग्न व्यक्ति वा समूह जोसुकै भए पनि निष्पक्ष अनुसन्धानमार्फत पहिचान गरी कानुनी कारबाही गर्नुपर्ने उनको जोड छ ।
उनले अहिलेको प्राथमिकता एकअर्कालाई दोष लगाउनु नभई घटनाको सत्य बाहिर ल्याउनु हुनुपर्ने बताएका छन् । भदौ २४ का घटनाले समाजमा छोडेको आशंका र अन्योल हटाउन सरकार गम्भीर भएर तथ्य संकलन तथा अनुसन्धानतर्फ अघि बढ्नुपर्ने उनको भनाइ छ ।
भट्टराईको भनाइमा, राज्यका संरचना फेरि निर्माण गर्न सकिएला, तर नष्ट भएका कतिपय ऐतिहासिक अभिलेख र प्रमाण सधैँका लागि गुम्न सक्छन् । त्यसैले घटनाको अनुसन्धानमा ढिलाइ नगरी सत्यतथ्य सुरक्षित गर्ने र सार्वजनिक गर्ने दिशामा सरकार अघि बढ्नुपर्ने आवश्यकता उनले औँल्याएका छन् ।
कार्की आयोगको प्रतिवेदन सार्वजनिक गर्ने र भदौ २४ का घटनाका बाँकी पक्षमाथि विश्वसनीय छानबिन अघि बढाउने विषय अब सरकारका लागि परीक्षणको विषय बनेको छ । भट्टराईले यही प्रक्रियाबाट मात्रै घटनाबारे उठेका प्रश्नको विश्वसनीय जवाफ पाउन सकिने बताएका छन् ।
