नारायण ढुङ्गाना, चितवन– उपप्रमुख बनेको पहिलो दिन कुर्सीमा बस्दा ताराकुमारी काजी महतोलाई नौलो लाग्यो । पहिले सचिवको कुर्सीमा थिइन् अहिले उपप्रमुखको कुर्सीमा ।
ADVERTISEMENT
माडी नगरपालिकाको उपप्रमुखको कुर्सीमा बसेपछि ताराकुमारीले पहिलो दिन हिजो वडाध्यक्षसँग छलफल गरिन्। “परिचयात्मक कार्यक्रम भो, पहिले कर्मचारी थिएँ, अहिले जनप्रतिनिधि भएकी छु” खुसी हुँदै ताराकुमारीले भनिन् ‘‘अब बोझ बढेको छ ।’’
ADVERTISEMENT
उनको चिन्ता अब कसरी माडीको विकास गर्ने भन्ने छ । माडीमा जङ्गली जन्तुको आतङ्क छ । खहरे खोला नालाले माडीमा वर्षात्का बेला आतङ्क नै मच्चाउँछ । निकुञ्जले घेरिएको उपत्यका भएकाले स्रोतसाधन, उद्योगधन्दा छैन । त्यसैले पनि माडीको विकास गर्न चुनौती छ । “अब माडीको मुहार कसरी फेर्ने, मेरो चिन्ता नै त्यही हो” ताराकुमारीले भनिन्।
गएको वैशाख १७ गते माडीको वडा सचिवबाट राजीनामा दिँदै गर्दा ताराकुमारी काजी महतोलाई खासै चिन्ता भएन । पार्टीबाटै तपाईं आउनुपर्यो भनेपछि उनले राजीनामा दिएर उपप्रमुखको आकाँक्षा राखिन् ।
उपप्रमुख भए पनि र नभए पनि जागिर गुमेकोमा कुनै चिन्ता लागेन ताराकुमारी लाई । “कति गर्नु एउटै काम, जे त होला भनेर त्यागेँ” ताराकुमारीले भनिन्। एमाले पार्टीले तीन नारायण पौडेल, चन्द्र बानियाँ र ताराकुमारीको नाम सिफारिस भयो । पछि उनी छानिइन् ।
प्रमुखमा माओवादी केन्द्रको उम्मेदवार भए पनि उपप्रमुखमा अन्तत जित उनकै भयो । उनले माओवादी केन्द्रकी सरिता चौधरीलाई हराइन् । माडीलाई इको नगर बनाउने, सुकुम्वासी समस्या समाधान गर्ने, खोलानाला व्यवस्थापन, जङ्गली जनावर आक्रमणको न्यूनीकरण तथा कृषि उत्पादनको वृद्धिमा लाग्ने उनले अठोट गरेकी छन् ।
माडीका स्थानीय गोविन्द न्यौपाने उनले अन्य उम्मेदवारलाई पछि पारेर जित्नुमा उनको सामाजिक व्यक्तित्व र गाविसमा छँदा कमाएको छवी नै भएको दाबी गर्छिन् । त्यसैले पनि प्रमुखमा माओवादी केन्द्र जित्दै गर्दा एमालेबाट उनी उपप्रमुखमा निर्वाचित भएकी हुन् । दलित महिला सदस्यमा विजयी भएकी माडीकी इन्दिरा विक उनले अरुपार्टीको पनि मत जित्न सफल भएकी बताउँछिन् ।
त्रिचालिस वर्षीया ताराकुमारी काजी महतोको घर माडी–३ वसन्तपुर हो । प्लस टु पास गरेकी उनकी दुई छोरी छन् । श्रीमान् जयराम महतो शिक्षक छन्। एसएलसीपछि २० वर्षमा बिहे भएको थियो उनको । छोरी जन्मेपछि कष्टले प्लस टु गरेकोे अनुभव सुनाइने तारादेवीले । २०६१ सालमा पहिलो पटक उनले जागिर सुरु गरिन् ।
युनिसेफमा बालबालिकासम्बन्धी परियोजनामा जागिर पाइन् । त्यसपछि उनले २०६३ सालमा साविक बघौडा गाविसको कार्यालय सहायकको जागिर पाइन् । त्यसपछि माडी नगरपालिका बन्यो ।
उनी वडा नम्बर ३, ४, ५ को वडा सचिव बनिन् । त्यही वडा सचिव हुँदै गर्दा स्थानीय निकायको निर्वाचन आएपछि राजीनामा दिएर राजनीतिमा होमिएकी उनले अब विकासमा लाग्ने अठोट गरेकी छन् । उनी भन्छिन् “अब मैले गरेर देखाउने दिन आएको छ ।”
