निर्मलाको न्यायको लागि नेविसंघले विरोध प्रदर्शन गर्ने

काठमाडौँ– बलात्कारपछि हत्या गरिएकी १३ वर्षीय बालिका निर्मला पन्तको न्यायको माग गर्दै प्रमुख प्रतिपक्षी दल नेपाली कांग्रेसको भातृ संगठन नेपाल विद्यार्थी संघले विरोध प्रदर्शन गर्ने भएको छ ।

नेविसंघले सोमबार (भोलि) विश्वभाषा क्याम्पस, प्रदर्शनीमार्गमा विरोध गर्न लागिएको नेविसंघका अध्यक्ष नैनसिंह महरले जानकारी दिए । दुई महिना बित्न लागिसक्दा पनि सरकारले बलात्कारी/हत्यारालाई सार्वजनिक गर्न नसकेको भन्दै आलोचना भइरहेका बेला नेविसंघ पनि न्यायको लागि शसक्त रुपमा लागेको छ ।

नेविसंघको आन्तरिक विवाद टुंगिसकेर महाधिवशनको मिति समेत तय भइसकेको समयमा सिंगो नेविसंघ एकजुट भएर निर्मलाको न्यायको लागि शान्तिपूर्ण आन्दोलनमा उत्रिने अध्यक्ष महरले बताए ।

प्रतिपक्षी दल नेपाली कांग्रेसले पनि संसदमा निर्मालाको मुद्दालाई दह्रो रुपमा उठाइरहेको छ । यता हत्याको घटना छानबिन गर्न नेपाल प्रहरीले आजै डीआईजी धीरु बस्न्यात नेतृत्वमा अर्को ‘शक्तिशाली’ समिति गठन गरेको छ ।