असार १४ को निर्वाचनमा सहभागी नहुने राजपाको निर्णय, आइतबार तराईका सम्पूर्ण जिल्लामा बन्द आह्वान

काठमाडौँ– स्थानीय तह दोस्रो चरणको निर्वाचनमा सहभागी हुने बिश्वासका साथ सरकारले मनोनयन दर्ता प्रक्रिया दुई दिन पछि सारेपनि राष्ट्रिय जनता पार्टी नेपालले असार १४ गतेको चुनावमा सहभागी नहुने निर्णय गरेको छ ।

राजपासँगको लामो छलफलपछि दुई नम्बर प्रदेशको निर्वाचन असोज २ गतेलाई सारेपनि राजपाले निर्वाचन आफुहरुको सरोकारको बिषय नभएको बताएको हो । सरकारले एउटा प्रदेशको मात्र निर्वाचन सारेर जनस्तरमै बिभाजन ल्याउन खोजेको उसको आरोप छ । राजधानीको विजुलीबजारस्थित पार्टी कार्यालयमा आज बसेको राजपा अध्यक्ष मण्डलको बैठकले यथास्थितिमा निर्वाचनमा सहभागी नहुने निर्णय गरेको हो ।

षडयन्त्र पुर्वक ढङ्गले सरकारले तराईलाई खण्डीत गर्न खोजेको आरोप लगाउदै आफुहरुका माग सम्वोधन नभएसम्म कुनै पनि निर्वाचनमा सहभागी नहुने निर्णय गरेको अध्यक्ष मण्डलका नेता राजकिशोर यादवले जानकारी दिए । आजका लागि पूर्वनिर्धारित मनोनयन दर्ता प्रक्रियालाई लक्षित गरी चार दिने आमहड्ताल आह्वान गरेको राजपाले आन्दोलनका कार्यक्रम समेत लम्ब्याउने निर्णय गरेको छ ।

संशोधित निर्वाचन कार्यतालिकाअनुसार पर्सी आइतबार मनोनयन मिति तोकिएको छ । राजपाको परिमार्जित कार्यक्रमअनुसार, भोली तराइका जिल्लामा लाठी जुलुस प्रदर्शन गर्ने र मनोनयन दर्ता गर्ने दिन पर्सी आइतवार मेचीदेखि महाकालीसम्मका तराईका जिल्लामा बन्द आह्वान गरिएको छ ।

नेता यादवले असार १४ गते सम्मका लागि यसअघि निर्धारित कार्यक्रममा भने कुनै फेरबदल नगरिएको जानकारी दिए ।