काठमाडौं । अमेरिकी राष्ट्रपति डोनाल्ड ट्रम्पले चीनसँगको सम्बन्धमा ठूलो प्रगति भएको बताएका छन् ।

ADVERTISEMENT

वर्षभरि ‘जस्तालाई त्यस्तै’ जसरी एकअर्कामाथि व्यापार कर लगाउँदै आएका अमेरिका र चीनको सम्बन्ध तनावमा छ । यी दुई देशबिच ‘व्यापार युद्ध’ को अवस्था रहेका बेला वर्षको अन्त्यमा अमेरिकी राष्ट्रपतिले सम्बन्ध सुधारको संकेत दिएका हुन् ।

ADVERTISEMENT

# # #

यो वर्षको सुरुमा अमेरिकी राष्ट्रपति ट्रम्पले दुई देशको व्यापारमा रहेको असन्तुलन कम गर्नका लागि चीनले आवश्यक प्रयास नगरेको आरोप लगाएपछि अमेरिका–चीनबिच व्यापार युद्धको अवस्था आएको हो ।

तर डिसेम्बरको सुरुमा दुवै देश नयाँ व्यापार कम नलगाउनेमा सहमत भएका हुन् । यसले वार्ताको वातावरण बनायो । ट्रम्पले शनिबार आफू र चिनियाँ राष्ट्रपति सी जिन–पिङ्गबिच टेलिफोनवार्ता भएको बताएका छन् ।

टेलिफोनवार्ता निकै राम्रो रहेको र सम्बन्ध सुधारको पक्षमा काम हुने संकेत ट्रम्पले दिएका हुन् । तर ट्रम्पले वास्तवमा के कुरामा कसरी प्रगति भएको छ भन्नेबारे केही बताएनन् ।

चीनको सरकारी समाचार संस्था सिनह्वाले ट्रम्प र सीबिच टेलिफोन वार्ता भएको पुष्टि गरेको छ । तर उसले पनि वार्ताबारे केही जानकारी दिएको छैन ।

अमेरिकाले सहकार्यका लागि गरेको प्रयासको चिनियाँ राष्ट्रपति सीले प्रशंसा गरेको चीनको सरकारी टेलिभिजन सिसिटिभीले जनाएको छ । अमेरिकाले व्यवहारिक सम्बन्धका लागि प्रयास गर्नु राम्रो रहेको सीको भनाई छ ।

चीनको व्यापार रणनीतिका कारण अमेरिकी उत्पादनलाई कम प्रतिस्पर्धी बनाएको आरोप लगाउँदै अमेरिकामा चिनियाँ सामानमाथिको व्यापार कर ट्रम्पले बढाए ।

त्यसको जवाफमा चीनले पनि अमेरिकी सामानमाथिको कर बढायो । वर्षभरि यो क्रम चलिरहेको थियो । यसले गर्दा तनावमा पुगेको अमेरिका–चीन सम्बन्ध ट्रम्प–सी टेलिफोन वार्ताले सुधारको आशमा लगेको छ ।