काठमाडौँ – प्रमुख प्रतिपक्षी दल नेपाली कांग्रेसका सांसद मोहम्मद अफताव आलमले सरकारले सिंहदरबारस्थित पुतली बगैँचाको जग्गामा संघीय संसद भवन बनाउन लागेकोमा खुसी प्रकट गरेका छन् । आफूले लामो समयदेखि संसदमा उठाउँदै आएको विषय सम्बोधन भएको भन्दै उनले खुसी व्यक्त गरेका हुन् ।
यो सरकारको पहिलो नीति तथा कार्यक्रम प्रस्तुत हुँदाखेरि नै संसदको आफ्नै भवन हुनुपर्छ भन्ने आवाज उठाएको भन्दै उनले भने, ‘संसदलाई लोकतन्त्रको मन्दिर भनिन्छ । मैँले त्यतिखेर नै भनेको थिएँ, भाडाको घर लोकतन्त्रको मन्दिर हुन सक्दैन । मैँले भनेँपछि नै सरकारले यो वर्षको नीति तथा कार्यक्रममा संसद बनाउने कुरा समावेश गरेको हो ।’
यसअघि आलमले छिमेकी मुलकले बनाइदिएको भवनमा लोकतन्त्रको मूल मन्दिर मानिने संसद चलेकोमा असन्तोष प्रकट गर्दै सरकारलाई संसद बनाउने आँट त गर्न सुझाएका थिए ।
संघीय संसदको भवन प्रधानमन्त्री ओलीले बुधबार नै शिलान्यास गरेका छन् । १ सय ७३ रोपनी क्षेत्रमा फैलने भवनमा प्रतिनिधिसभा र राष्ट्रियसभा रहनेछ। तीन वर्षमा बन्ने उक्त भवनको लागत पाँच अर्ब ३० करोड रहेको छ । हाल नयाँ बानेश्वरस्थित अन्तर्राष्ट्रिय सम्मेलन केन्द्रमा संसद सञ्चालन हुँदै आएको छ। अन्तर्राष्ट्रिय सम्मेलन केन्द्रलाई सरकारले वार्षिक १५ करोड भाडा तिर्ने गरेको छ।