बाजुरामा एक महिनामा दुई करोडको मदिरा बिक्रि

बाजुरा – गरिबीको रेखामुनि रहेको बाजुरामा एक महिनामा दुई करोडको मदिरा कारोबार भएको छ। वर्षैपिच्छे खाद्यान्न अभाव खेपिरहने जिल्लामा एक महिनामा दुई करोडभन्दा बढी मदिराको कारोबार हुने गरेको उद्योग वाणिज्य सङ्घले जनाएको छ।

उद्योग वाणिज्य सङ्घका कार्यालय सचिव टेकबहादुर धामीका अनुसार डेढ करोडदेखि दुई करोडसम्मको मदिरा यसै महिनामा कारोबार भएको छ। व्यावसायिक प्यान नम्बर लिएका मदिरा पसलबाट न्यूनतम् एक महिनामा दुई करोडभन्दा बढी मदिरा खपत भएको र त्योसँगै लाखौँका स्थानीयवासीद्वारा उत्पादन गरिएको अवैध मदिरा पनि बिक्री हुने गरेको उनले बताए।

जिल्लाभरि ८४१ ले मदिरा पसलको अनुमतिपत्र प्यान नम्बर लिएका छन्। आठ सय ४१ मदिराका पसलमध्ये १२ पसल मात्रै भ्याटमा दर्ता छन् भने बाँकी सबै पसल प्यानमा कारोबार गरिरहेका जनाइएको छ।

जिल्ला सदरमुकाम मार्तडीपछिको ठूलो व्यापारी केन्द्र कोल्टी बजारमा मदिराका थोक बिक्रेता मंगल थापाका अनुसार मासिक ३० देखि ४० लाखसम्मको मदिरा बिक्री गर्ने गरेको बताए। जिल्ला प्रहरी कार्यालयले गत वर्ष असोजदेखि हालसम्म करिब १५ हजार लिटर घरेलु मदिरा जफत गरेर नष्ट गरेको जनाएको छ।

जिल्लाका स्थानीय तह त्रिवेणी नगरपालिका, बूढीगंगा नगरपालिका, हिमाली गाउँपालिका र जगन्नाथ गाउँपालिकाले मदिरा निषेध गरेको छ भने गौमुल गाउँपालिकाले मदिरा सेवन बन्द नगरे पनि व्यवस्थापन गरेर मदिरा सेवन कार्ड प्रयोग गरेको छ।

रक्सी आएर असई कुट्नेविरुद्ध सार्वजनिक मुद्दा

रक्सी पिएर नेपाल प्रहरीका प्रहरी सहायक (असई)लाई कुटपिट गर्ने पाँच जना कर्मचारीविरूद्ध सार्वजनिक अपराध ऐनअन्तर्गत मुद्दा चलाइएको छ। बाजुरा सदरमुकाममा चलेको अनन्ते मेलामा सुरक्षार्थ खटिएका असई मानबहादुर चन्दमाथि आइतबार राति मादकपदार्थ सेवन गरी आक्रमण भएको घटनामा पाँच कर्मचारी पक्राउ परेका थिए।

प्रहरीका अनुसार उनीहरूलाई सोमबार नै सार्वजनिक अपराध ऐनअन्तर्गत दस दिनको म्याद लिई अनुसन्धान थालिएको बाजुराका प्रहरी नायब उपरीक्षक उद्धवसिंह भाटले बताए। पक्राउ पर्नेमा राष्ट्रिय वाणिज्य बैंकमा कार्यरत अमृत बोहरा र केशव गिरी, सरकारी वकील कार्यालयका कार्यालय सहयोगी हरिशंकर जोशी, बडीमालिका नगरपालिकामा कार्यरत प्राविधिक गोरख थापा र मेरी स्टोप सेन्टरमा कार्यरत अनमी धनी थापा रहेका छन्।

उनीहरूले आइतबार असईलाई ढुंगा प्रहार गरेका थिए। मदिरा पिएका उनीहरूले मदिरा नियन्त्रणमा खटिएका प्रहरीलाई ढुंगा हानेका थिए।

‘घटनामा संलग्न सबैलाई सार्वजनिक अपराध कसुरमा मुद्दाअघि बढाइएको छ,’ भाटले भने। रासस