कालापानीबारे सरकारलाई कांग्रेसको प्रश्न : कुटनैतिक पहलकदमी गर्न अलमल किन ?

काठमाडौँ – प्रमुख प्रतिपक्षी दल नेपाली कांग्रेसले भारतले नेपाली भूमि कालापानी क्षेत्र समटिएको नक्सा जारी गरेको एक महिना बित्दा पनि सरकारले कुटनीतिक पहल नगर्नु दुःखद रहेको प्रतिक्रिया जनाएको छ ।

मंगलबार एक विज्ञप्ती जारी गर्दै कांग्रेसले आभूतपूर्व राष्ट्रिय एकता कायम हुँदा पनि भारतीय सेना कालापानी क्षेत्रबाट हटाएर उच्चस्तरीय कुटनीतिक राजनैतिक पहल गरिनुपर्नेमा सरकार मौन रहेनुले अनेक आशंका पैदा गरेको जनाएको छ ।

‘घटना लगत्तै नेपाली कांग्रेसले गम्भीर विमती त प्रकट गर्यो नै । तर, अभूतपूर्व राष्ट्रिय एकता हुँदाहुँदै पनि यो एक महिना दिनको अवधिमा सरकारले न त गम्भीर कुटनैतिक पहल गरेको सुनिएको छ न त उच्चस्तरीय राजनैतिक संवाद गरेको देखिएको छ ।’ कांग्रेस प्रवक्ता विश्वप्रकाश शर्माद्वारा जारी विज्ञप्तीमा भनिएको छ, ‘केवल प्रतिक्रिया मात्रै जनाएर सरकारको कर्तव्य पूरा हुन्न ।’

बलियो राष्ट्रिय एकताको साझा अभिमतलाई नेतृत्व गर्न र परिणाम हासिल गर्ने ढंगले सदुपयोग गर्न यस बीचमा सरकारले अयोग्यता प्रदर्शन गरेको कांग्रेसको निष्कर्ष छ । कालापानीबाट भारतीय सना हटाएर कुटनीतिक र राजनैतिक पहलका लागि कांग्रेसले सरकारलाई फेरी पनि दृढ ढंगले साथ दिने प्रतिबद्धता जनाएको छ ।

राष्ट्रवादको अडान परिणाममुखी हुनुपर्ने भन्दै कांग्रेसले कालापानी प्रकरण वर्तमान सरकारको परीक्षाको घडी रहेको जनाएको छ । ‘सबै दल र सम्पूर्ण नेपालीको साथ रहँदा पनि गम्भीर पहलकदमी नहुनु दुःखद त छ नै प्रश्न पनि उब्जिएको छ ।’ कांग्रेसले भनेको छ, ‘हिजोको राष्ट्रवादको उग्र भाव कृत्रिम थियो । आज के प्राकृतिक स्वरुपमा लुलो राष्ट्रवाद प्रकट भएको हो ?’

साथै कांग्रेसले देशको वास्तविक नक्सा सार्वजनिक गर्न किन ढिलाई भयो भन्दै प्रश्न गरेको छ । ‘गम्भीर कुटनैतिक पहलकदमी गर्न अलमल किन ? उच्च स्तरीय राजनैतिक संवाद मार्फत परिणाम हासिल गर्ने प्रक्रिया अघि बढाउन शासकीय योग्यता अभाव किन ?’ कांग्रेसको विज्ञप्तीमा उल्लेख छ ।

कालापानी, लिपुलेक र लिम्पियाधुरा नेपालका अविभाज्य भूमी रहेको भन्दै कांग्रेसले त्यहाँबाट भारतीय सुरक्षाबल फिर्ता हुनुपर्ने धारणा पुनः दोहोर्‍याएको छ ।