काठमाडौँ – प्रमुख प्रतिपक्षी नेपाली कांग्रेसले संसद अधिवेशन तत्काल बोलाउन माग गरेको छ । बुधबार पार्टी सभापति शेरबहादुर देउवा निवासमा बसेको पार्टी केन्द्रीय कार्यसमितिका पदाधिकारी एवं पूर्व पदाधिकारीहरुको बैठकले संसद उक्त माग गरेको हो ।
ADVERTISEMENT
बैठकले मंगलबार राष्ट्रपतिमार्फत सरकारले जारी गरेको संवैधानिक परिषद् सम्बन्धी अध्यादेश संविधानको मर्म र भावना विपरीत रहेको ठहर समेत गरेको छ । संसद अधिवेशन छलेर संविधानको मर्म विपरीत अध्यादेश जारी गरेर वर्तमान सरकारले अलोकतान्त्रिक र सर्वसत्तावादी चरित्र थप उजागर गरेको बैठकको निष्कर्ष छ ।
ADVERTISEMENT
संवैधानिक परिषद्को गरिमा समाप्त पारेर जारी अध्यादेश पश्चात् कुनै पनि निर्णय भएको या गरिने दुवै स्थितिमा नेपाली कांग्रेसलाई सो मान्य नहुने चेतावनी दिंदै बैठकले अध्यादेश तत्काल फिर्ता गर्न माग गरेको छ । कांग्रेस संसदीय दल कार्यसमिति बैठक पुस ३ गते बिहान ११ बजे बोलाउने निर्णय समेत बैठकले गरेको छ ।
सरकारको सर्वसत्तावाद, तनहुँमा नेता रामचन्द्र पौडेल माथि भएको दुर्व्यवहार, कोभिडविरुद्ध सरकारको अकर्मण्यता र भ्रष्टाचारविरुद्ध कांग्रेसले गरेको मंसिर २९ गतेको देशव्यापी प्रदर्शनले व्यापक जनअभिमत प्रकट गरेको निष्कर्ष समेत बैठकले निकालेको छ ।
यस्तै उखु किसानको माग सुनुवाइ गरेर उखुको बक्यौता अविलम्ब किसानलाई चुक्ता गर्न, गराउन आवश्यक पहल र समन्वयका लागि कांग्रेसले सरकारसँग माग गरेको छ ।
