बैतडी– नेकपा (माओवादी केन्द्र) का प्रदेश नम्बर ७ का इञ्चार्ज लेखराज भट्टले अब हुने प्रदेश र संघको निर्वाचनका लागि गाउँगाउँमा खट्न पार्टी कार्यकर्तालाई निर्देशन दिएका छन् ।
पार्टीलाई पहिलो बनाउन खटेर लाग्न पनि कार्यकर्तालाई उनले निर्देशन दिएका छन् । पार्टी प्रशिक्षणका लागि मंगलबार बैतडीको पाटन पुग्नु भएका नेता भट्टले स्थानीय तहको निर्वाचनमा माओवादी केन्द्रलाई भोट दिने जनतालाई धन्यवाद दिँदै अबको निर्वाचनमा पनि माओवादी केन्द्रलाई भोट दिन आग्रह गरे।
प्रदेश सभा र प्रतिनिधिसभाको निर्वाचनको सन्दर्भमा माओवादी केन्द्रले जिल्लास्तरीय प्रशिक्षण तथा बैठकको आयोजना गरेको हो । माओवादी केन्द्रका जिल्ला संयोजक प्रेम प्रकाश भट्ट ‘आदित्य’को अध्यक्षतामा भएको प्रशिक्षण तथा बैठकमा माओवादी केन्द्रका ७ नम्बर प्रदेश इञ्चार्ज लेखराज भट्ट प्रमुख अतिथी रहेका थिए ।
कार्यक्रममा पोलिटब्युरो सदस्य रेणु चन्द र नरेन्द्र कुँवर ‘विजयसुन्दर’को पनि उपस्थिति रहेको थियो । आज पनि बैठक बस्ने र बैठकमा आगामी प्रदेशसभा र प्रतिनिधिसभाको निर्वाचनको उम्मेदवारका विषयमा छलफल हुने माओवादी केन्द्रका जिल्ला कमिटी सदस्य भुवनचन्द्र विश्वकर्मा ‘शान’ले जानकारी दिए ।