यस्तो छ प्रारम्भिक मतपरिणाम : कांग्रेस अग्र स्थानमा, एमाले पच्छ्याउँदै

काठमाडौँ– प्रदेश नम्बर २ का ८ जिल्लामा भएको स्थानीय तहको तेस्रो चरणको निर्वाचनपछि मतगणना जारी छ । कतिपय वडा तहको मतपरिणाम सार्वजनिक भैसकेको छ र प्रारम्भिक नतिजा आउने क्रम जारी छ।

१३६ मध्ये राजविराज नगरपालिका बाहेक सबैमा मतगणना सुरु भैसकेको निर्वाचन आयोगले जनाएको छ । ८ वटा जिल्लाका १३६ वटा स्थानीय तहमा सोमबार मतदान भएको थियो । प्रदेश नम्बर २ का स्थानीय तहका १३६ स्थानीय तहमा भएको निर्वाचनको सबै नतिजा शनिबारसम्म गर्ने गरी भएको मतगणनामा भइरहेको छ।

हालसम्म १०१ स्थानीय तहको प्रारम्भिक नतिजामा नेपाली कांग्रेसको सुरुआती अग्रता कायम रहे पनि अन्तर घट्दै गएको देखिन्छ।

कांग्रेसले सबैभन्दा बढी ३१ स्थानका मेयर र अध्यक्षमा अग्रता लिएको छ। यस्तै नेकपा एमालेले २० स्थानमा अगाडी रहेको छ भने उपेन्द्र यादवको संघीय समाजवादी फोरम १९ स्थानीय तहमा अगाडी रहेको छ ।

नेकपा माओवादी केन्द्रले १६ स्थानमा अग्रता कायम गरिरहँदा मधेस केन्द्रित पाँच पार्टी मिलेर बनेको राष्ट्रिय जनता पार्टी (राजपा) १३ स्थानमा अगाडी रहेको छ ।