बाबुछोराद्वारा संगै सगरमाथाको सफल आरोहण

ताप्लेजुङ– मैवाखोला गाउँपालिका–४ का १६ वर्षीय सोनाम शेर्पा र उनका बाबुले सँगै सगरमाथाको सफल आरोहण गरेका छन् ।

आज बिहान ८ः५० बजे छोरा सोनाम र उनका बाबु पूर्णकुमार (पिके) शेर्पाले सफल आरोहण गरेको हिमालयन गाइड्स नेपाल ट्रेक एन्ड एक्सपिडिशन प्रालिका प्रबन्धक ईश्वरी पौडेलले जानकारी दिएको हो ।

दुवै जना उक्त प्रालिमार्फत आरोहणका लागि गएका थिए । सोनाम आवश्यक तयारीका लागि एक महिनाअघि नै सगरमाथा बेस क्याम्प पुपुगेका थिए भने पिके गत वैशाख २४ गते अनुमति पत्र लिएर त्यसतर्फ लागेका थिए । मौसममा आएको खराबीले केही दिन बेस क्याम्पमै रहेको र मौसम खुलेसँगै अघि बढेका बाबुछोराले आज आरोहण गर्न सफल भएको पौडेलको भनाई छ ।

यता पर्यटन विभागले समेत उनीहरुले आरोहण गरेको सूचना आएको जनाएको छ । ‘पिके शेर्पा र उहाँका छोरा दुवैले आरोहण गरेको भन्ने बेस क्याम्प र त्यस माथिबाट हामीलाई सूचना आएको छ’, पर्वतारोहण विभागकी निर्देशक मीरा आचार्यले भनिन् । उनका अनुसार एक्सपिडिशन रिपोर्ट आएपछि विभागले छानबिन गर्ने र आरोहण पुष्टि भए आधिकारिकता प्रदान गरिने छ ।

यस्तै, हालसम्ममा सगरमाथा आरोह गर्ने सोनाम सबैभन्दा कान्छो आरोही हुन सक्ने आचार्यको भनाइ छ । यद्यपि अहिले नै यसै हो भनेर भन्न नसकिने उनले स्पष्ट पारे । ‘१६ वर्ष मुनिकाले आरोहण गर्न पाउँदैनन् । उहाँ १६ वर्ष पूरा भएर आउनुभएको थियो, पूर्णरुपमा डकुमेन्ट हेरेर छानबिनपछि मात्र भन्न सकिन्छ’, उनले भनिन् ।

विसं २०६१ फागनु १५ गते जन्मिएका शेर्पाले गत चैत २६ गते मात्रै जिल्ला प्रशासन कार्यालयबाट नागरिकता लिएको प्रमुख जिल्ला अधिकारी उमेश पाण्डेले जनाएका छन् । रासस

थि