निजी सवारी, ट्याक्सी र पसल खुल्दा फुटपाथका साना व्यवसायमा प्रतिवन्ध कायमै

काठमाडौँ – मंगलवार (भोलि) देखि काठमाडौँ उपत्यकाको निषेधाज्ञा खुकुलो हुने भएको छ । आइतवार साँझ बसेको उपत्यकाका तीन प्रमुख जिल्ला अधिकारी (सीडीओ)को बैठकले केही क्षेत्रमा प्रतिवन्ध कायम राखि आंशिक रुपमा बन्दाबन्दी खोल्ने निर्णय गरेको हो ।

जसअनुसार नाकामा कडाइ गरि उपत्यकाभित्र निजी सवारी र ट्याक्सी जोर बिजोरमा सञ्चालन हुन दिइने भएको छ । स्वास्थ्य मापदण्ड अपनाएर सर्वसाधारणलाई हिँडडुल गर्न पनि दिने निर्णय बैठकले गरेको छ ।

खाद्यान्न, तरकारी, दूध तथा दूधजन्य पदार्थ, पुस्तक पसल बिहाना ११ बजेसम्म र हार्डवेयर एवं निर्माण सामाग्रीका पसल ११ बजेदेखि साँझ ७ बजेसम्म सँधैँ सञ्चालन हुन पाउनेछन् । अन्य पसलहरु जोर बिजोरमा चलाउन दिने निर्णय बैठकले गरेकोमा सोमवार, बुधवार र शुक्रवार सपिङ मल, खेलकुद सामाग्रीका पसल, कपडा, जुत्ता, गिफ्ट, टेलरिङ पसल र आइतवार, मंगलवार र बिहीवार सुनचाँदी, भाँडा, विद्युतीय सामाग्री, अटोमोबाइल, घरायसी सामान लगायतका पसल संचालन गर्न दिने बताइएको छ । होटल तथा रेष्टुराँ लगायत अन्य सेवा पनि अनलाइनमार्फत तथा टेक अवे सेवा प्रदान गर्न दिने निर्णय बैठकले गरेको छ ।

तर कोरोनाको जोखिम कायम भएको भन्दै फुटपाथ, खुल्ला ठाउँ र सडक किनारामा हुने व्यवसायमा प्रतिवन्ध यथावत राखिएको छ । यस्ता क्षेत्रबाट कोरोनाको जोखिम हुने भन्दै बैठकले प्रतिवन्ध कायम नै राख्ने निर्णय गरेकोमा खुला ठाउँ, फुटपाथ लगायतका क्षेत्रमा सामान विक्री वितरण गर्नमा रोक लगाएको छ । सिडिओहरुको यो निर्णयको सामाजिक संजालमा आलोचना भएको छ ।