नेपालमा पनि डेल्टा भेरियन्टको परिवर्तित स्वरुप पुष्टि, सचेत रहन मन्त्रालयको आग्रह

काठमाडौँ– स्वास्थ्य तथा जनसङ्ख्या मन्त्रालयले नेपालमा पनि कोभिड–१९ सङ्क्रमणको डेल्टा भेरियन्टको परिवर्तित रुप फेला परेको जनाएको छ ।

आज एक विज्ञप्ति जारी गर्दै मन्त्रालयले गत जेठ २६ गते आणुवंशिक (जिन सिक्यन्सिङ) का लागि भारतको नयाँ दिल्लीमा पठाइएको २७ वटा डेल्टा भेरियन्टमध्ये नयाँ रुप नौ वटा नमूनामा फेला परेको जनाएको हो ।

देखा परेको भेरियन्टको नयाँ स्वरुपलाई ‘AY.1’ को नाम दिइएको मन्त्रालयका सहप्रवक्ता डा. समिरकुमार अधिकारीले जनाएका छन् । उनका अनुसार, हालसम्म यस म्युटेसन नेपालसहित अन्य विभिन्न १० देशमा देखिएको छ ।

यी सहित नेपालमा varient of concern का रुपमा अल्फा (B.1.1.7) र डेल्टा (B.1.617.2) तथा कप्पा (B.1.617.1) भेरियन्ट पुष्टि भएको छ ।

डेल्टाको उत्परिवर्तन भेरियन्ट बढी सङ्क्रामक तथा सबै उमेर समूहका व्यक्तिमा असर गर्ने भएकाले यसको रोकथाम एवम् नियन्त्रणका लागि प्रत्येक व्यक्ति सचेत रहि जिम्मेवारी बन्दै जनस्वास्थ्य मापदण्डको पालना गर्न/गराउन समेत मन्त्रालयले सर्वसाधारणलाई अपिल गरेको छ ।