साउन २५ देखि ३२ गतेसम्म खोप सप्ताह मनाउने सरकारको घोषणा

काठमाडौँ– नेपाल सरकारले एक साता खोप सप्ताह मनाउने बताएको छ ।

बिहीबार संसदको शिक्षा तथा स्वास्थ्य समितिको बैठकमा स्वास्थ्य तथा जनसङ्ख्या राज्यमन्त्री उमेश श्रेष्ठले यहि आगामी सोमबारदेखि अर्काे सोमबार अर्थात्, साउन २५ देखि ३२ गतेसम्म ‘खोप सप्ताह मनाइने जानकारी दिएका हुन् ।

उनका अनुसार, उक्त खोप सप्ताहका क्रममा दोस्रो डोजको खोप दिने कार्यलाई प्राथमिकता दिइनेछ ।

उक्त कार्यक्रममा राज्यमन्त्री श्रेष्ठले दोस्रो डोज खोप नपाएका १३ लाख ५० हजारलाई जापान र भुटानबाट आएको खोप लगाइने जनाउँदै शनिबार र आइतबारसम्ममा सो खोप ल्याइने जानकारी दिए ।

जापान सरकारले नेपाललाई सहयोगको लागि प्रतिबद्धता गरेको १६ लाख डोज एस्ट्राजेनेका खोपमध्ये करिब आधा (८ लाख डोज) अगामी शनिबार र आइतबार आइपुग्दै छ, भने भुटानले पनि नेपाललाई ३ लाख खोप दिने प्रतिबद्धता जनाएको छ ।