उम्मेदवारी फिर्ताको समय सकियो, उम्मेदवारले आज निर्वाचन चिन्ह पाउँदै

काठमाडौँ– निर्वाचन आयोगले आगामी मंसिर २१ गते दोस्रो चरणमा हुने निर्वाचनका लागि मनोनयन दर्ता गराएका उम्मेदवारको अन्तिम नामावली प्रकाशन गरी आज निर्वाचन चिन्ह प्रदान गर्दैछ ।

उम्मेदवारविरुद्ध परेका उजुरीमाथि छानविन गरी हिजो प्रारम्भिक नामावली प्रकाशन गरेको आयोगले उम्मेदवारी फिर्ताका लागि आज १ बजेसम्मको समय दिएको थियो । आयोगले उम्मेदवारी फिर्ताको समय सकिए लगत्तै ३ बजेसम्म अन्तिम नामावली प्रकाशन गर्ने समय तोकेको थियो ।

अहिले केहीबेरपछिबाट साँझ ६ बजेसम्म उम्मेदवारलाई निर्वाचन चिन्ह उपलब्ध गराउने आयोगका प्रवक्ता नवराज ढकालले जानकारी दिए । दोस्रो चरणमा १ सय २८ प्रतिनिधिसभा र २ सय ५६ प्रदेशसभाका लागि मंसिर २१ गते मतदान हुँदैछ । दोस्रो चरणको निर्वाचनमा १ करोड २२ लाख ३५ हजार ९ सय ९० मतदाता सहभागी हुने निर्वाचन आयोगले जनाएको छ । यसैबीच प्रमुख निर्वाचन आयुक्त अयोधी प्रसाद यादवले आसन्न निर्वाचनको अनुगमनमा खटिने कमर्मचारीलाई स्वतन्त्र र निष्पक्ष भई काम गर्न आग्रह गरेका छन् ।

आयोगको कार्यालयमा आज सह–सचिव स्तरीय निर्वाचनमा खटिने अनुगमन टोलीका प्रमुखलाई प्रशिक्षण दिने क्रममा प्रमुख आयुक्त यादवले निर्वाचनका बेला आइपर्ने प्रतिकुलताको सामना गरी काम गर्न आग्रह गरेका हुन् । उनले हिमाली जिल्लामा हुन सक्ने मौसमी प्रतिकुलता, भौगोलिक कठिनता, र उम्मेदवार/उम्मेदवारबीच हुन सक्ने झडपका बेला समन्वय गर्न आग्रह गरे ।

मतदानका क्रममा कुनै गैरकानुनी गतिविधि भए मतदान स्थलको फोटो खिचेर नजिकको निर्वाचन अधिकृतको कार्यलयमा पठाइ जानकारी गराउन पनि अनुगमनमा खटिने कर्मचारीलाई प्रमुख आयुक्त यादवले आग्रह गरेका छन् ।