प्रधानमन्त्री देउवाको भीम रावललाई प्रश्न – ‘आफू मन्त्रिपरिषद्मा रहँदा एमसीसी किन पास गरेको ?’

काठमाडौँ– प्रधानमन्त्री शेरबहादुर देउवाले मिलेनियम च्यालेन्ज कर्पोरेशन (एमसीसी) नेपालको हितमा रहेको आफ्नो धारणा दोहोर्‍याएका छन् । आज नुवाकोटको किस्पाङ गाउँपालिकाको नवनिर्मित भवनको उद्घाटन गर्दै उनले सो धारणा पुनः व्यक्त गरेका हुन् ।

सो कार्यक्रममा प्रधानमन्त्री देउवाले हालै प्रतिनिधिसभाबाट पारित भएको उक्त एमसिसी परियोजनाका बारेमा गरिएका नकारात्मक टिप्पणीहरु भ्रममात्र भएको पनि स्पष्ट पारेका छन् । सो प्रसङ्गमा उनले यस परियोजनाको विरोध गर्ने एमाले नेता भीम रावलले आफैँ मन्त्रिपरिषद्मा रहँदा सो परियोजना पास गरेको तर अहिले आएर विरोध मात्र गरेको समेत उल्लेख गरे।

कार्यक्रम स्थलबाटै प्रश्न गर्दै उनले भने, ‘आफैँ मन्त्री भएका बेला मन्त्रिपरिषद्बाट पास गरेका भीम रावलले त्यसबेला किन आलोचना गर्नुभएन ? त्यतिबेला राजीनामा नदिएर के हेरेर बसेको ?’ आक्रोशित हुँदै उनले अघि बोले, ‘आफू पार्टीको नेता र मन्त्री हुँदा आफैँले मन्त्रिपरिषदबाट पारित गर्ने अनि अहिले किन विरोध गर्दैछन् ? विरोध गर्ने भए त्यसैबला मन्त्रीबाट राजीनामा दिएर बाहिर आउनुपर्दैनथ्यो ?’

कार्यक्रमलाई सम्बोधन गर्ने क्रममा देउवाले एमसीसीका बारेमा जवाफ दिनैपर्ने अवस्था आएको बताए । एमसीसीको प्रक्रिया रावल मन्त्री भएको बखत नै अघि बढेपनि त्यतिबेला नबोलेर अहिले पूर्वमन्त्री एवं एमाले नेता रावल आफैँले यसको विरोध गरेकोप्रति उनले असन्तुष्टि जनाए ।

यस्तै, पूर्वप्रधानमन्त्री केपी शर्मा ओलीले सदनमा ल्याएको प्रस्तावलाई पनि आफूले पारित गरेको उनको भनाई छ ।