निहारिकाद्वारा नायिका करिश्माको प्रस्ताव अस्वीकार, भनिन्– ‘मलाई दया होइन न्याय चाहिएको छ’

काठमाडौँ– बलात्कारीलाई कारवाहीको माग गर्दै अनशन बसेकी ‘कुमारी आमा’ निहारिका राजपूतलाई भेट्न नायिका करिश्मा मानन्धर गत शुक्रवार उनकै डेरामा पुगिन् ।

सरकारका विभिन्न निकायसँग ५ बुँदे सहमतिपत्रमा हस्ताक्षर गर्दै आफ्नो अनशन तोडेकी राजपूतलाई भटेर नायिका मानन्धरले उनीसंगै उनको बच्चालाई आफुले ‘एडप्ट’ गर्न चाहेको भन्दै आफ्नै घर हिड्न आग्रह समेत गरिन् । यद्यपि उनको सो प्रस्तावलाई निहारिकाले भने ठाडै अस्वीकार गरेकी छन् ।

उक्त लडाई लड्नुको अर्थ आफुले कसैको घरमा बास पाउनकै लागि नभएको उनको भनाई छ । उनी भन्छिन्, ‘मलाई न्याय चाहिएको छ, दया होइन ।’ यद्यपि मानन्धरप्रति आभारी जनाउँदै उनले भनिन्, ‘करिश्मा दिदीको माया र सद्भावका लागि म एकदमै आभारी छु । तर, मैले कसैको दयाको पात्र बन्न यो कठिन संघर्ष गरिरहेको छैन । मलाई चाहिएको न्याय हो । उहाँले न्यायको संघर्षमा पनि साथ दिनुभयो भने त्यो मेरो लागि धेरै ठूलो कुरा हुनेछ ।’

यस्तै, आफु सक्षम भएको र आफैँ कमाएर आफ्नो बच्चा हुर्काउन सक्ने बताउँदै रापूतले थपिन्, ‘मेरो हातखुट्टा सहि सलामत छ । म आफै काम गरेर आफ्नो बच्चा पाल्न सक्छु । मलाई खालि न्याय चाहिएको छ । मलाई दया देखाउनुभन्दा पनि मानसिक रुपमा बलियो बनाउने कोशिस गरिदिनुभयो भने थ्यांकफुल हुन्छु ।’