म्यानचेस्टर युनाइटेडको शानदार जित, सिटीसँगको अंक दूरी छोट्यायो

काठमाडौं-इंग्लिस प्रिमियर लिगमा म्यानचेस्टर युनाइटेडले स्टोक सिटीमाथि शानदार जित हात पारेको छ । सोमबार राति भएको खेलमा युनाइटेडले स्टोक सिटीलाई ३–० गोलअन्तरले हराउँदै लिगमा म्यान्चेस्टर सिटीसँगको अंक दूरी १२ मा झारेको छ।

आफ्नो घरेलु मैदानमा भएको खेलमा युनाइटेडलाई जिताउन एन्टोनियो भ्यालेन्सिया, एन्थोनी मार्टियल र रोमेलु लुकाकुले गोल गरे। सुरुवातदेखि दबाब बनाएको युनाइटेडले खेलको नवौं मिनेटमा एनटोनी भ्यालेन्सियाको गोलबाट अग्रता लिएको थियो । खेलको ३८औं मिनेटमा मार्टियलले गोल गर्दै युनाइटेडलाई दोब्बर अग्रतामा पुर्‍याएका थिए। पहिलो हाफमा म्यान्चेस्टर युनाइटेड २–० गोलअन्तरले अघि रहेको थियो ।

पहिलो हाफमा २–० गोलअन्तरले पछि परेको स्टोक सिटीले दोस्रो हाफमा पनि राम्रो प्रदर्शन गर्न सकेन। दोस्रो हाफमा स्टोक सिटीले थप १ गोल खान पुग्यो । खेलको ७२ औं मिनेटमा लुकाकुले गोल गर्दै युनाइटेडलाई ३–० गोलको जित दिलाएका हुन् । जितसँगै शीर्ष स्थानमा रहेको म्यान्चेस्टर सिटीसँगको अंक दूरी १२ मा झारेको छ। म्यान्चेस्टर सिटीको २३ खेलबाट ६२ अंक रहेको छ भने जितपछि समान २३ खेलबाट म्यान्चेस्टर युनाइटेडको ५० अंक भएको छ ।

पराजित स्टोक सिटीको भने २३ खेलबाट २० अंक रहेको छ। लिगमा तेस्रो स्थानमा भने लिभरपुलको २३ खेलबाट ४७ अंक छ । त्यस्तै, चौथो र पाँचौ स्थानमा रहेको चेल्सीको पनि समान ४७ अंक छ। पाँचौ स्थानमा रहेको टोटनह्यामको ४४ अंक छ।