टी-२० सिरिज : आयरल्याण्ड वुल्भ्सद्वारा नेपाल ‘ए’लाई २२३ रनको विशाल चुनौती

काठमाडौँ– काठमाडौँमा आजदेखि सुरु भएको द्विपक्षीय टी–२० सिरिजको पहिलो खेलमा टेस्ट राष्ट्र आयरल्याण्डको ‘ए’ टोली आयरल्याण्ड वुल्भ्सले नेपाल ‘ए’ टोलीलाई २२३ रनको विशाल चुनौती दिएको छ ।

शुक्रबार कीर्तिपुरस्थित त्रिवि क्रिकेट मैदानमा टस हारेर पहिले ब्याटिङ गरेको आयरल्याण्ड वुल्भ्सले निर्धारित २० ओभरमा ५ विकेट गुमाउँदै २२२ रन बनाएको हो । आयल्याण्डलाई विशाल योगफलसम्म पुर्याउने क्रममा पिटर मूरले सर्वाधिक ४९ रन हाने । त्यसक्रममा उनले ३२ बलमा ४ चौका र ३ छक्का प्रहार गरे ।

यस्तै केड कार्मिकल र कप्तान नेल रकले समान ३८–३८, स्टेफिन डोहेनीले ३४ तथा ग्रेथ डिलानीले नटआउट ३० रन बनाए । आयल्याण्डका ब्याटरले कूल १४ वटा छक्का र १५ वटा चौका प्रहार गरे ।

बलिङतर्फ नेपाल ‘ए’का कमलसिंह ऐरीले सर्वाधिक ३ विकेट लिए । करिब डेढ वर्षपछि पुनरागमन गरेका कमलले ४ ओभरमा ३९ रन खर्चिएर ३ विकेट लिए । यस्तै सागर ढकाल र आरिफ शेखले समान १–१ विकेट लिए ।

नेपाल ‘ए’ र आयल्याण्डबती ३ वटा टी–२० र ३ वटा एकदिवसीय खेल हुँदैछन् ।