प्रधानमन्त्री ओलीले साउन ६ गते विश्वासको मत लिने

काठमाडौँ – नवनियुक्त प्रधानमन्त्री केपी शर्माओलीले साउन ६ गते प्रतिनिधिसभामा विश्वासको मत लिने भएका छन् । प्रधानमन्त्री ओलीले आइतबार विश्वासको मत लिने निर्णय गरेको नेकपा एमालेका प्रमुख सचेतक महेश बर्तौलाले जानकारी दिए ।

उनका अनुसार संवैधानिक रुपमा विश्वासको मत लिन ३० दिन समय रहे पनि प्रधानमन्त्री ओलीले विश्वासको मत लिएर ढुक्कसँग काम गर्ने सोचका साथ उक्त निर्णय गरेका हुन् । संसदमा प्रधानमन्त्री ओलीलाई एमाले र काँग्रेससहित जनता समाजवादी पाटी (जसपा), जनमत पार्टी, लोकतान्त्रिक समाजवादी पार्टी (लोसपा) लगायतको समेत समर्थन रहने छ ।

असार २८ गते प्रधानमन्त्री पुष्पकमल दाहाल ‘प्रचण्ड’ले संसदमा विश्वासको मत पाउन नसकी पदमुक्त भएपछि एमाले अध्यक्ष ओली नेपाली काँग्रेससहितको समर्थनमा प्रधानमन्त्री बनेका हुन् । उनलाई राष्ट्रपति राममचन्द्र पौडेलले संविधानको धारा ७६(२) अनुसार असार ३० गते प्रधानमन्त्रीमा नियुक्त गरेका थिए ।

तेस्रो पटक प्रधानमन्त्री बनेका ओलीले असार ३१ गते पदबहाली गरेका थिए ।