उपसभामुखले देशको शिर झुकाएको कांग्रेसको आरोप, राजीनामा दिएर मार्गप्रशस्त गर्न आग्रह

काठमाडौँ– नेपाली कांग्रेसले उपसभामुख इन्दिरा रानाको राजीनामा मागेको छ ।

आज पार्टी सभापति शेरबहादुर देउवा निवासमा बसेको पदाधिकारी बैठकले उपसभामुखले विभिन्न व्यक्तिको नाम उल्लेख गरेर अमेरिकी दूतावासलाई अन्तर्वार्ताको मितिका लागि पत्र लेख्ने कामले सदनको शिर निहुराएको ठहर गर्दै राजीनामा मागेको हो ।

बैठकले उपसभामुखमाथि प्रश्न उठेकाले मार्ग प्रशस्त गर्न उपयुक्त हुने निष्कर्ष निकालेको प्रमुख सचेतक श्याम घिमिरेले जानकारी दिए । यस विषयमा सत्ता गठबन्धनको साझा धारणा बनाएर यस सन्दर्भमा चाँडै संसदीय दलको बैठक बस्ने उनले बताए ।

‘कांग्रेसको बैठकअघि सत्तारुढ दलहरुसँग छलफल गरेर साझा धारणा बनाएर अघि बढ्छौं । यो उहाँमाथि गम्भीर प्रश्न उठेको छ । उहाँले त्यस्तो कुनै सिफारिस गर्ने मिल्दैन । त्यसले संसदलाई नै अपमानित गरेको छ । यसले मुलुकको शिर झुकाएको कांग्रेसको बुझाइ छ’, घिमिरेले भने ।