प्रधान सेनापति सिग्देलद्वारा भारतमा तालिमरत अधिकृत क्याडेटहरुको अन्तिम दलेल कवाज निरीक्षण तथा अवलोकन

कनभारत– प्रधान सेनापति शोक राज सिग्देलले भारतमा तालिमरत अधिकृत क्याडेटहरुको अन्तिम दलेल कवाज निरीक्षण तथा अवलोकन गरेका छन् ।

मित्रराष्ट्र भारतको औपचारिक भ्रमणमा रहेका प्रधान सेनापति सिग्देलले हिजो भारतको देहरादुनस्थित भारतीय सैनिक एकेडेमीमा तालिमरत अधिकृत क्याडेटहरुको अन्तिम दलेल कवाजमा प्रमुख अतिथिको रूपमा सहभागी भएका छन् ।

सो अवसरमा उनले अधिकृत क्याडेटहरुद्वारा प्रदर्शन गरिएको अन्तिम दलेल कवाजको निरीक्षण तथा अवलोकन गरे । कार्यक्रममा उनले नवनियुक्त अधिकृतहरुलाई दर्ज्यानी चिन्ह प्रदान गर्नुका साथै उनीहरुसँग अन्तरक्रिया समेत गरेका हुन् ।

नेपाली सेनाले वि.सं २०१० सालदेखि भारतीय सैनिक एकेडेमीमा आफ्ना अधिकृत क्याडेटहरुलाई तालिममा सहभागी गराउँदै आएको छ । हालसम्म उक्त एकेडेमीबाट दुईसय भन्दा बढी नेपाली सेनाका अधिकृत क्याडेटहरु दीक्षित भइसकेका छन् ।

१२ देशका अधिकृत क्याडेटहरु तालिमरत उक्त एकेडेमीमा हाल नेपाली सेनाबाट ६ जना अधिकृत क्याडेटहरु तालिमरत रहेका छन् ।