काठमाडौँ– नेपाल अटोमोबाइल्स एसोसिएसन (नासा नेपाल) को स्वागत तथा सम्मान कार्यक्रम सम्पन्न भएको छ । नासा नेपालले शनिवार होटेल रोयल ट्युलिप काठमाडौंमा भव्य रुपमा सम्मान तथा स्वागत कार्यक्रम सम्पन्न गरेको हो ।
ADVERTISEMENT
कार्यक्रममा प्रमुख अतिथि युवा तथा खेलकुद मन्त्री माननीय तेजु लाल चौधरी, माननीय सांसदहरू, राष्ट्रिय खेलकुद परिषदका उच्च पदाधिकारीहरू तथा नेपालका खेलकुद एवं मोटरस्पोर्ट्स क्षेत्रका प्रतिष्ठित व्यक्तित्वहरूको उपस्थिति रहेको थियो ।
ADVERTISEMENT
नासा नेपालका उपाध्यक्ष तथा कार्यक्रम सञ्चालक अनिल कुमार बरालको उत्कृष्ट संयोजनमा कार्यक्रम उद्घाटन समारोहबाट सुरु भएको कार्यक्रममा प्रमुख अतिथि सहित अन्य विशिष्ट अतिथिहरूले झण्डा फहराएर कार्यक्रमको औपचारिक सुरुवात गरेका थिए ।
सोही अवसरमा नासा नेपालले सन् २०२४ मा स्पेनमा आयोजित वर्ल्ड मोटरस्पोर्ट्स गेम्स्मा सहभागिता जनाएको ऐतिहासिक उपलब्धिलाई विशेष रूपमा सम्मान समेत गरेको थियो ।
समारोहमा राष्ट्रिय खेलकुद परिषदका नवनियुक्त उपाध्यक्ष ध्रुव आचार्य र बोर्ड सदस्यहरूलाई नासा नेपालले औपचारिक रूपमा स्वागत गर्दै अन्तर्राष्ट्रिय मोटरस्पोर्ट्स प्रतिस्पर्धामा नेपाललाई प्रतिनिधित्व गरेका खेलाडीहरू तथा पदाधिकारीलाई सम्मान समेत गरियो ।
सम्मननित हुनेहरुमा दशरथ रिसाल (अध्यक्ष नासा नेपाल), दिप्रश शाक्य (ईस्पोर्टस विधा), कृष्ण प्रसाद पौडेल (अटो–सलालम विधा), प्रज्ञा कँडेल (अटो–सलालम विधा), यदुराज लामिछाने (टोली व्यवस्थापक) र टिकाराम यात्री (पत्रकार प्रतिनिधि) रहेका छन् ।
कार्यक्रमको अर्को महत्वपूर्ण पक्ष नासा नेपालका सचिव दिप्रश शाक्यले आफ्नो र्याली सवारी नासा नेपाललाई हस्तान्तरण गरे । यस महत्वपूर्ण क्षणमा प्रमुख अतिथि माननीय तेजु लाल चौधरी, सांसद योगेश भट्टराई, सांसद उदय शम्शेर जबरा तथा अन्य विशिष्ट व्यक्तिहरू साक्षी रहेका थिए ।
यस अवसरमा एफआईए वर्ल्ड सदस्य गोविन्द भट्टराई, राष्ट्रिय खेलकुद परिषदका सदस्य सचिव टंकलाल घिसिङ, सांसदहरू तथा अन्य अतिथिहरूले मोटरस्पोर्ट्सको नेपालमा बढ्दो महत्व र नासा नेपालको योगदानबारे विचार व्यक्त गरे।
नासा नेपालका अध्यक्ष दसारथ रिजालको धन्यवाद मन्तव्यसँगै कार्यक्रम समापन भएको थियो, जसपश्चात् सहभागीहरूका लागि विशेष ककटेल डिनरको आयोजना गरिएको थियो । यो कार्यक्रम नेपालका मोटरस्पोर्ट्स यात्राको अर्को महत्वपूर्ण उपलब्धि बनेको छ।
