कुलमानलाई हटाएको भन्दै विद्यार्थीले जलाए ऊर्जामन्त्रीको पुत्ला

काठमाडौँ–नेपाल विद्युत प्राधिकरणका कार्यकारी निर्देशक कुलमान घिसिङलाई हटाएको भन्दै विद्यार्थीहरुले ऊर्जामन्त्री दीपक खड्काको पुत्ला दहन गरेका छन् ।

कुलमान घिसिङलाई हटाएको विरोधमा नेकपा एकीकृत समाजवादी निकट विद्यार्थी संगठन अनेरास्ववियूले काठमाडौंको प्रदर्शनीमार्गस्थित विश्वभाषा क्याम्पस अगाडी ऊर्जामन्त्रीको पुत्ला दहन गरेका हुन् ।

ऊर्जामन्त्रीको पुत्ला दहन भएपछि प्रहरीले हस्तक्षेप गरेर निभाएको थियो । प्रदर्शनका क्रममा बिद्यार्थीहरुले ऊर्जामन्त्रीको राजीनामा समेत माग गरेका छन् ।

अनेरास्ववियूका अध्यक्ष महेश श्रेष्ठले कुलमान घिसिङले ऊर्जा विकासमा गरेको कामप्रति समर्थन रहेको भन्दै उनलाई हटाउने कामको विरोध गरे ।

सोमबार बसेको मन्त्रिपरिषद्को बैठकले कुलमानलाई बर्खास्त गर्ने निर्णय गरेको थियो। कुलमानलाई हटाएसँगै सरकारले प्राधिकरणको कार्यकारी निर्देशकमा हितेन्द्रदेव शाक्यलाई नियुक्त गर्ने निर्णय गरेको छ ।

सरकारले प्रदर्शनको सम्भावनलाई मध्यनजर गर्दै प्राधिकरण अगाडि सुरक्षा समेत बढाएको छ ।