बीवाईडी र बजाजका स्पेयर पार्टस् खुलेआम गैरकानूनी बिक्री, एमआरपी नराखिएका सामानमा विभागको छापा !

काठमाडौँ – नेपाली इभी मार्केटमा दबदबा कायम गरेको बीवाईडी गाडीका स्पेयर पार्टस् नै गैरकानुनी रुपमा विक्री गर्ने गरेको पाइएको छ । बिहीबार उद्योग, वाणिज्य तथा आपूर्ति व्यवस्था विभागले स्पेयर पार्टस्मा अधिकतम खुद्रा मूल्य (एमआरपी) नराखेरै बिक्री गर्ने दुईवटा सर्भिस सेन्टरमा छापा मारेको हो ।

जस अनुसार बीवाईडीका गाडीको स्पेयर बिक्री गर्ने ललितपुरको कुपण्डोलस्थित इको इभी केयर प्रा.लि.मा एमआरपी नराखेरै स्पेयर पार्टस् बिक्री गरेको पाइएको छ । विभागले उक्त सर्भिस सेन्टरलाई सिल गर्दै अर्को आदेश नभएसम्मका लागि विक्री वितरण रोक्का गर्न निर्देशन दिएको छ । साथै उपभोक्ता हित संरक्षण ऐन, २०७५ को दफा ६ (२)को खण्ड (ञ) बमोजिमको कसुरमा व्यवसायसँग सम्बन्धित दर्ता, प्रमाणपत्र, पान, भ्याट, करचुक्ता, खरिदबिक्री बिल लगायतका कागजात लिइ ३ दिनभित्र विभागमा उपस्थित हुन निर्देशन गरेको छ ।

आफ्नो ब्राण्डका गाडीका स्पेयर पार्टस्मा ठगी धन्दा चलिरहँदा बीवाईडी गाडीको नेपालका लागि आधिकारिक बिक्रेता साइमेक्स इन्क प्रा.लि.ले भने नदेखेझैँ गरिरहेको छ । यसबारे बुझ्न खोज्दा साइमेक्स इन्क प्रा.लि.सँग सम्पर्क हुन सकेन ।

यस्तै विभागले आजै बजाज मोटरसाइकलको लागि नेपालको आधिकारिक विक्रेता हंशराज हुलाशचन्द एन्ड कम्पनी प्रा.लि.मा छापा मारेको छ । कम्पनीको काठमाडौँको कुलेश्वरमा रहेको सर्भिस सेन्टरमा स्पेयर पार्टस्मा उपभोक्ता हित संरक्षण ऐन, २०७५ को दफा ६ (२)को खण्ड (ञ) बमोजिम एमआरपी नराखेरै बिक्री वितरण गरिएको भन्दै छापा मारिएको हो ।

सो क्रममा विभागले केही स्पेयर पार्टस्हरु समेत जफत गरेको छ । जफतपछि विभागले कम्पनीलाई स्पेयर पार्टस् विक्री वितरण रोक्का गर्दै गोदामको स्टक विवरण, आयात भएको भन्सार प्रज्ञापन पत्र, व्यवसाय दर्ता प्रमाणपत्र, पान दर्ता, करचुक्ता लगायतका सम्पूर्ण कागजात लिएर ३ दिन भित्र वाणिज्य विभाग बबरमहलमा उपस्थित हुन निर्देशन दिएको छ ।

पछिल्लो समय बजारमा एमआरपी नराखेरै वस्तुहरु विक्री वितरण गर्ने प्रवृत्ति बढ्दै गएपछि उद्योग, वाणिज्य तथा आपूर्ति व्यवस्था विभागले आजदेखि कठोर अनुगमन सुरु गरेको विभागका महानिर्देशक कुमार दाहालले बताए ।

अनुगमनबारे के भन्छन् विभागका महानिर्देशक दाहाल ?

आज हामीले बीवाईडी ईभी र बजाजको स्पेयर पार्टस्को अनुगमन गरेका थियौँ । अनुगमनमा इलेक्ट्रिक गाडी र म्यानुअल गार्डीको स्पेयर पार्टस्मा कतै पनि एमआरपी लेखिएको भेटिएन । हामीले त्यसको नमूना समेत संकलन गरेका छौँ र दुई तीनवटा पसलहरु सिल गरेर कारोबार बन्द गरेर आएका छौँ ।

स्पेयर पार्टस्मा एमआरपी नहालेर बिक्री गरेको देखियो । अब हामी गाडी लगायतका साधनको स्पेयर पार्टस् विक्री वितरण सम्बन्धी यसको मूल्य, गुणात्मकता के कस्तो छ भन्ने विषयमा अनुगमन गर्दैेछौँ ।

यस्तै आजै हामीले विभागको वेबसाइटमा एउटा सूचना प्रकाशित गरिसकेका छौँ कि उपभोक्तको हातमा पुग्ने जुनसुकै वस्तुहरुको लेबल (मूल्य, तौल, गुणस्तर, उत्पादन मिति र म्याद सकिने मितिसहितको विवरण) नलगाइकन विक्री वितरण गर्न नपाइने भनेका छौँ । त्यस्तो गरेको नपाइएमा जफत गर्छौं र ऐन अनुसार हामी कारबाही गर्छौं ।

भोलिदेखि तीव्र अनुगमन सुरु हुन्छ । बाँकी रहेकालाई पनि कानुन अनसार कारवाही हुन्छ । अहिले जहाँ हात हाल्यो, त्यहीँ गिलो भेटिएको छ । अर्बौंको कारोबार गर्ने मोबाइलस्हरु कम्पनीले आफ्नो एमआरपी राख्दैनन् । डण्डी र छडको विषयमा पनि कुरा त्यस्तै उठेको छ । उहाँहरुले एकहप्ताभित्र हामी एमआरपी राख्छौँ भन्नुभएको छ । तर, एमआरपी राख्नुभन्दा अघि नै मूल्य वृद्धि गरिराख्नुभएको छ ।

यसले गर्दा कताकता निगरानी नपुगेको हो कि, हामी उपभोक्ता हेपिएका हौँ कि, विक्रेताहरुले बढी हेलचक्र्याईं गरेको हो कि जस्तो देखिएको छ । यसमा हामी अब कठोर बन्छौँ ।