निर्णय कार्यान्वयनको माग गर्दै आज पनि डाक्टर आन्दोलनमा

काठमाडौँ– सरकारले तोकेअनुसार न्यूनतम पारिश्रमिक नदिएर श्रम शोषण भएको भन्दै आन्दोलनरत चिकित्सकहरुले शुक्रबार पनि काठमाडौंमा प्रदर्शन गरेको छ ।

आवासीय चिकित्सकलाई सेवा सुविधा दिने निर्णय भएपनि कार्यान्वयन नभएको भन्दै उनीहरुले शुक्रबार काठमाडौंको माइतिघरमा विरोध प्रदर्शन गरेका हुन् ।

उनीहरुले चिकित्सा आयोगद्वारा निर्धारित आठौ तहको तलव संरचना कार्यान्वयन र शैक्षिक प्रगतिको संरक्षणका लागि पहल गर्न सरकारसंग माग गरेका छन् ।

नेपाल चिकित्सक संघका अध्यक्ष डा. अनिलविक्रम कार्कीले न्यूनतम पारिश्रमिक नदिने तर आवासीय डाक्टरलाई काममा फर्कन निजी मेडिकल कलेजले दवाव दिएको बताए । उनले सरकारले तोकेअनुसार न्यूनतम पारिश्रमिक पाउने वातावरण नवनेसम्म आन्दोलन जारी राख्ने जनाए ।

आवासीय चिकित्सकलाई सरकारी आठौं तह सरह सेवा दिने निर्णय कार्यान्वयन नभएको भन्दै नेपाल चिकित्सक संघको नेतृत्वमा आवासीय डाक्टरले आन्दोलन गरेका हुन् ।