काठमाडौं – राजसंस्था पुनर्स्थापनाको मागसहित राप्रपाको नेतृत्वमा आज काठमाडौं केन्द्रित संयुक्त जनआन्दोलन सुरु हुँदैछ। आन्दोलनअन्तर्गत काठमाडौं उपत्यकाका सात स्थानबाट जुलुस निस्किने कार्यक्रम तय भएको छ, जसको नेतृत्व विभिन्न नेताहरूले गर्नेछन्।
ADVERTISEMENT
प्रवक्ता मोहन श्रेष्ठका अनुसार दिउँसो २ बजे रत्नपार्कमा मुख्य जनप्रदर्शन गर्नुअघि मैतीदेवी, सिफल, नक्साल, नारायणचौर, त्रिपुरेश्वर, सुन्धारा र थप एक स्थानबाट छुट्टाछुट्टै जुलुस निकालिनेछ। यी सबै जुलुस अन्ततः रत्नपार्कमा गएर मिसिनेछन्।
ADVERTISEMENT
मैतीदेवीबाट निस्कने मुख्य जुलुसको नेतृत्व स्वयं राप्रपा अध्यक्ष राजेन्द्र लिङ्देनले गर्नेछन्। यद्यपि, आजै संसदमा बजेट प्रस्तुत हुने भएकाले उनी आन्दोलनपछि संसद् जाने कार्यक्रम रहेको बताइएको छ। बाँकी स्थानहरूबाट निस्कने जुलुसको नेतृत्वमा राप्रपाका उपाध्यक्ष, केन्द्रीय सदस्य तथा संयुक्त जनआन्दोलन समितिका अन्य नेताहरू रहनेछन्।
संयुक्त जनआन्दोलन समितिका वयोवृद्ध संयोजक नवराज सुबेदीसमेत आजको प्रदर्शनमा सहभागी हुने कार्यक्रम छ। तिनकुनेको अघिल्लो प्रदर्शनमा अश्रुग्यास खेपेका सुबेदी यसपटक विशेष सतर्कताका साथ आउनेछन्।
आयोजकका अनुसार आजको आन्दोलन पूर्णतया शान्तिपूर्ण हुनेछ। जुलुसमा नाराजुलुस, सांस्कृतिक प्रस्तुति र नाचगान रहनेछ, भने सुरक्षालाई लिएर कुनै मुठभेडको नीति नराखिएको जनाइएको छ।
