इटहरी–स्पष्ट नम्बर प्लेट नराख्ने सवारीमाथि पूर्व क्षेत्रिय ट्राफिक प्रहरी कार्यालय इटहरीले कारबाही शुरु गरेको छ । दुर्घटना गरेर सवारी फरार हुने घटना बढेको भन्दै यस्ता सवारीलाई नियन्त्रणमा लिइ कारबाही शुरु गरेको हो ।
पूर्व क्षेत्रका बिभिन्न जिल्लाहरुमा रातको समयमा सबारी ठक्कर दिएर फरार हुने घटनामा बृद्धि भएपछि अभियान नै संञ्चालन गरी सबै जिल्लामा कारबाही शुरु गरिएको पूर्व क्षेत्रिय ट्राफिक प्रहरी कार्यालय इटहरीले जनाएको छ ।
इटहरीमा आज बिनानम्बर र स्पष्ट नम्बर प्लेट नराखी संचालन गर्ने १६ वटा सबारीमाथि ५ सयको दरले जरिवाना गरिएको छ । साथै सबारी नियन्त्रणमा लिइ ठाँउको ठाँउ नम्बर लेख्न लगाउनुको साथै चेतनामुलक प्रशिक्षणमा सहभागी गराई छाडिएको थियो ।
जसमा अधिकाशं मोटरसाइकल र ट्याक्टर रहेका छन् । अभियानलाई निरन्तर रुपमा अगाडि बढाईने समेत ट्राफिक प्रहरी कार्यालयले जनाएको छ ।