राैतहट । मधेश प्रदेशमा डीआईजी गाेबिन्द थपलिया तस्करी बिरूद्द आक्रामक बनेर प्रस्तुत भईरहेका छन् । डीआईजी थपलिया नेतृत्वकाे प्रहरीले प्रदेशमा शान्ति सुरक्षा, अपराध नियन्त्रण, तस्करी नियन्त्रण लगायतका प्रहरी कामकारबाहीमा खराे उत्रिएका हुन् । यस्काे पछिल्लो उदाहरण हाे, ९० लाख बढीको अबैध फर्सीको बिउ बरामद !
ADVERTISEMENT
जिल्ला प्रहरी कार्यालय रौतहटका प्रवक्ता डिएसपी वसन्त गौतमका अनुसार विशेष सूचनाको आधारमा नेपाल प्रहरी र सशस्त्र प्रहरीको संयुक्त टोलीले बुधबार साँझ साढे ७ बजे बौधीमाई नगरपालिका–७ बाडका बंकुल टोल क्षेत्रमा छापा मारेको थियो। सीमावर्ती बाटो नजिक त्रिपालले ढाकेर लुकाइछिपाइ राखिएको अवस्थामा उक्त ठुलो परिमाणमा फर्सीको बिउ फेला परेको हो।
ADVERTISEMENT
प्रहरीले ३२२ बोरा फर्सीको बिउ (जम्मा १२ हजार ८८० किलोग्राम) बरामद गरेको जनाएको छ। बरामद बिउको अनुमानित बजार मूल्य ९० लाख १६ हजार रुपैयाँ रहेको छ। बरामद सामग्री आवश्यक कारबाहीका लागि जिल्ला भन्सार कार्यालय गौरमा बुझाइएको जिल्ला प्रहरी प्रवक्ता डीएसपी गौतमले जानकारी दिएका छन्।
उक्त फर्सीको बीउ नियन्त्रणमा लिने क्रममा केही स्थानीय व्यक्तिहरूले अवरोध गर्दै ढुंगामुढा गरेका थिए। स्थिति नियन्त्रणमा लिन प्रहरीले ६ राउण्ड अश्रुग्याँस प्रहार गरेको जनाएको छ। घटनाका क्रममा ढुंगामुढाबाट तीन जना स्थानीय र तीन जना प्रहरी कर्मचारी गरी कुल ६ जना सामान्य घाइते भएका छन्। घाइतेहरूको अवस्था सामान्य रहेको प्रहरीले जनाएको छ।
जिल्ला प्रहरी कार्यालय रौतहटका प्रमुख एसपी सिताराम रिजालका अनुसार सीमावर्ती क्षेत्रमा हुने अवैध ओसारपसार नियन्त्रणका लागि निगरानी र कारबाहीलाई थप कडाइ गरिएको छ। घटनाबारे थप अनुसन्धान भइरहेको प्रहरीले जनाएको छ। एक महिना अघि पनि तस्करहरूले नेपालबाट भारत तर्फ लागिरहेको करीब ७० लाख मूल्य बराबरको फर्सीको बीउ भारतीय सीमा सुरक्षा बल एसएसबीले भारत घोडासहन थानाक्षेत्र अन्तर्गत बरामद गरी कारबाहीको दायरामा ल्याएको थियो।
तस्करहरूले रौतहट र बाराको विभिन्न चोर नाकाहुदै चाईनिज फर्सीको बीउ भारतको विभिन्न प्रान्तमा तस्करीको माध्यमले पुर्याउने गर्दछन्। पछिल्लो समय भारतमा फर्सीको बीउ डाईटको रूपमा लिने गरेको बताइएको छ।
