चितवन पुगेर देउवाले भने– माओवादीलाई भोट दिनुहोस्

चितवन– स्थानीय तहको पहिलो चरणको चुनाव प्रचारको अन्तिम दिन संयुक्त आमसभाका लागि चितवन पुगेका नेपाली कांग्रेसका सभापति शेरबहादुर देउवाले कार्यकर्ताहरुलाई कसैको भड्काउमा नलाग्न निर्देशन दिएका छन् ।

चितवनको भरतपुरस्थित केन्द्रीय बस टर्मिनलमा कांग्रेस र माओवादीको संयुक्त चुनावी सभालाई सम्बोधन गर्दै सभापति देउवाले पोखरामा माओवादीले कांग्रेसका उम्मेदवारलाई सहयोग गर्ने भएकाले भरतपुर महानगरपालिकामा कांग्रेसले माओवादी उम्मेदवारलाई सहयोग गर्नुपर्ने बताए ।

सभालाई सम्बोधन गर्दै देउवाले भने ‘ सहयोग दोहोरो हुन्छ, कही हामी सहयोग गर्छौ, कहि हामीलाई सहयोग हुन्छ, त्यसकारण तपाइँहरु कसैको भड्काउमा नलाग्नुस् ।’ भरतपुर महानगरपालिकाको चुनावी सभालाई सम्बोधन गर्न माओवादी अध्यक्ष पुष्पकमल दाहाल र कांग्रेस सभापति देउवा एउटै जहाज चढेर भरतपुर पुगेका थिए ।

चितवनको भरतपुर महानगरपालिकामा कांग्रेस माओवादी गठबन्धनबाट माओवादी केन्द्रकी रेणु दाहाल मेयरको उम्मेद्वार रहेकी छन् । यस्तै उपमेयरमा कांग्रेसकी पार्वती शाह रहेकी छिन् ।